კომპანია OnePlus აცხადებს, რომ აშშ-სა და ევროპისთვის ახალ ტელეფონებს აღარ გამოუშვებს

სმარტფონების მწარმოებელმა კომპანია "OnePlus"-მა განაცხადა, რომ კომპანია ევროპისა და ჩრდილოეთ ამერიკის ბაზრებიდან გადის და ამ ქვეყნებისთვის ახალ პროდუქტებს აღარ წარადგენს.

Bloomberg-ის ინფორმაციით, Android სისტემის სმარტფონების მწარმოებელი OnePlus მიმდინარე კვირაში აშშ-სა და ევროპაში საქმიანობის შეწყვეტას, სამომხმარებლო ელექტრონიკაზე ფასების ზრდისა და ახალ შესყიდვებზე შემცირებული მოთხოვნის ფონზე გეგმავს.

ანგარიშში მოყვანილია წყაროს ინფორმაცია, რომლის მიხედვითაც OnePlus-ის მიერ აშშ-სა და ევროპაში მაღაზიების დახურვა მისი მშობელი კომპანიის, Oppo-ს კორპორაციული რესტრუქტურიზაციის ნაწილია. ასევე აღნიშნულია, რომ OnePlus საქმიანობას ინდოეთშიც შეწყვეტს, რომელიც ჩინეთის ფარგლებს გარეთ მისი ერთ-ერთი უმსხვილესი ბაზარია.

OnePlus პიტ ლაუმ და კარლ პეიმ 2013 წელს დააარსეს, რათა ტექნოლოგიების მოყვარულებისთვის ხელმისაწვდომი Android სმარტფონები ეწარმოებინათ. დროთა განმავლობაში კომპანიამ ასორტიმენტი გააფართოვა, რამაც მის პროდუქციაზე გლობალური მოთხოვნა გააჩინა.

Counterpoint-ის ანგარიშის თანახმად, 2026 წლის მეორე კვარტალში Oppo-ს მიწოდება წინა წლის ანალოგიურ პერიოდთან შედარებით ორნიშნა პროცენტული მაჩვენებლით შემცირდა. ანგარიშში აღნიშნულია, რომ კომპანიამ სუსტი მოთხოვნის გამო "სირთულეები თითქმის ყველა ძირითად ბაზარზე" იწვნია.

Bloomberg-ის თანახმად, კომპანია გეგმავს OnePlus-ის მუშაობა ჩინეთში გააგრძელოს, ხოლო საზღვარგარეთ, მაგალითად სკანდინავიის რეგიონში, სადაც წარმატებას მიაღწია, Realme-ს ბრენდის ტელეფონები გაყიდოს.