კოულ ალენს ბრალი ტრამპის მკვლელობის მცდელობისთვის წარედგინა

შაბათს, კორესპონდენტთა ასოციაციის ყოველწლიურ ვახშამზე სროლის გამო დაკავებულ 31 წლის კოულ ალენს ვაშინგტონის ფედერალურ სასამართლოში ბრალი ოფიციალურად წარედგინა. პროკურატურა მას პრეზიდენტ დონალდ ტრამპის მკვლელობის მცდელობასა და ძალადობრივი დანაშაულის დროს ცეცხლსასროლი იარაღის გამოყენებას ედავება. სახელმწიფო ბრალმდებლის განმარტებით, ის, რაც ალენმა ჩაიდინა, ტერორიზმის კატეგორიას განეკუთვნება.

შეგახსენებთ, შაბათს გამართულ ღონისძიებაზე, სადაც პრეზიდენტი ტრამპი და ვიცე-პრეზიდენტი ჯეი დი ვენსი იმყოფებოდნენ, ბრალდებულმა უსაფრთხოების საკონტროლო პუნქტი იარაღით გადაკვეთა და ცეცხლი გახსნა. ინციდენტის დროს მკერდის არეში დაიჭრა საიდუმლო სამსახურის ოფიცერიც, თუმცა მისი სიცოცხლე ტყვიაგაუმტარმა ჟილეტმა გადაარჩინა. აღსანიშნავია, რომ თავად თავდამსხმელმა იმ დარბაზში შესვლა ვერ მოასწრო, სადაც ტრამპი იმყოფებოდა. ის სამართალდამაცვებმა საპასუხო ცეცხლის გახსნიდან მალევე დააკავეს.

დაკავების მომენტში ალენს 12-კალიბრიანი თოფი, Rock Island Armory-ის პისტოლეტი და სამი დანა აღმოაჩნდა.

იუსტიციის დეპარტამენტის ინფორმაციით, ბრალდებულმა კალიფორნიიდან ვაშინგტონამდე გზა მატარებლით გამოიარა და დედაქალაქში პარასკევს ჩამოვიდა. გამოძიების მასალებით ირკვევა, რომ კალიფორნიის შტატის მცხოვრებმა ვაშინგტონის Hilton-ის სასტუმროში ნომერი ჯერ კიდევ 6 აპრილს დაჯავშნა.