კრედიტების აუთვისებლობა, ძირითადად, სახელმწიფო ელექტროსისტემისა და ინფრასტრუქტურის ნაწილში გვქონდა - კაკაურიძე
საქართველოს სახელმწიფო ელექტროსისტემამ გამოყოფილი საკრედიტო რესურსების ათვისება ვერ შეძლო. ამის შესახებ ფინანსთა მინისტრის მოადგილემ გიორგი კაკაურიძემ პარლამენტში, ეკონომიკური პოლიტიკის კომიტეტის სხდომაზე განაცხადა.
მისი განმარტებით, აუთვისებელი კრედიტების ყველაზე მსხვილი ნაწილი სწორედ ელექტროსისტემის პროექტებზე მოდის. შეფერხების მთავარი მიზეზი კი გადამცემი ხაზების მშენებლობასთან დაკავშირებით ადგილობრივი მოსახლეობის უკმაყოფილება და წინააღმდეგობა გახდა. კაკაურიძის თქმითვე, ეს პრობლემა მიმდინარე წელს მეტწილად უკვე გადაჭრილია.
„ერთი ნაწილი არის კრედიტების აუთვისებლობა. აქ საკითხი ორად შეიძლება გავყოთ: კრედიტების ნაწილი იყო ის, რომელთა ათვისებაც იმ წელს იგეგმებოდა, თუმცა ვერ განხორციელდა. ძირითადად, ეს იყო ელექტროსისტემის პროექტები და საგზაო ინფრასტრუქტურა, რომელიც ევროპის საინვესტიციო ბანკის მიერ ფინანსდებოდა. ეს ორი კომპონენტი იყო ყველაზე მსხვილი კრედიტების ნაწილში. ვერ განხორციელდა ტენდერი, იმიტომ რომ დონორს გარკვეული კითხვები ჰქონდა სავარაუდო კონტრაქტორებთან მიმართებით. შესაბამისად, საბოლოო ჯამში მიღებულ იქნა გადაწყვეტილება, რომ კონტრაქტი არ შედგა, ანუ ტენდერი არ შედგა და ამ მიმართულებით თავიდან გამოცხადდა.
ელექტროსისტემის ნაწილში იყო გარკვეული პრობლემები მოსახლეობის უკმაყოფილება მაღალი ძაბვის გადამცემი ხაზების მშენებლობასთან დაკავშირებით. ეს პრობლემა, ვფიქრობ, მეტწილად წელს უკვე გადაჭრილია და ელექტროსისტემა პროცესს საკმაოდ კარგად მიჰყვება. იყო შეთანხმებები მოსახლეობასთან და ზოგ შემთხვევაში პროექტმა გვერდი აუარა მათ და სხვა მიმართულებით განხორციელდა შესაბამისი ინფრასტრუქტურის მშენებლობა", - განაცხადა კაკაურიძემ.
BM.GE
წყარო: bm.ge