ლიეტუვის მთავრობა გადადგა

ლიეტუვის პრემიერ-მინისტრმა ინგა რუგინიენემ თანამდებობა დატოვა. ქვეყნის ლიდერმა გადაწყვეტილება მმართველი კოალიციის რეორგანიზაციის ფონზე მიიღო. არსებული ინფორმაციით, ქვეყნის მეოცე მინისტრთა კაბინეტმა გადადგომის შესახებ რეზოლუციას მხარი ერთხმად დღეს გამართულ ბოლო სხდომაზე დაუჭირა. მთავრობის მეთაურმა შესაბამისი განკარგულება ქვეყნის პრეზიდენტ გიტანას ნაუსედას უკვე წარუდგინა. ნაუსედამ მოქმედ კაბინეტს ახალი მთავრობის ფორმირებამდე მოვალეობის დროებით შესრულება სთხოვა.

რაც შეეხება ახალი კაბინეტის ფორმირების პროცესს, კოალიციური შეთანხმების თანახმად, პრეზიდენტმა პარლამენტს პრემიერ-მინისტრობის კანდიდატი თხუთმეტი დღის ვადაში უნდა წარუდგინოს. ამ პოზიციაზე სოციალ-დემოკრატების ლიდერი მინდაუგას სინკევიჩიუსი მოიზარება.

საკანონმდებლო ორგანოს მიერ მისი დამტკიცების შემდეგ, ახალ ხელმძღვანელს სამთავრობო პროგრამის წარსადგენად დამატებით თხუთმეტდღიანი ვადა მიეცემა. აღსანიშნავია, რომ ახალი მმართველი უმრავლესობა სამი სხვადასხვა პოლიტიკური ძალისგან იქნება შემდგარი და ის ქვეყნის საკანონმდებლო ორგანოში სამოცდათხუთმეტ მანდატს გააკონტროლებს. არსებული გეგმით, სამთავრობო გუნდში მინიმუმ ოთხი პორტფელი შეიცვლება, ხოლო თავად ინგა რუგინიენე სოციალური დაცვისა და შრომის მინისტრის პოსტს დაუბრუნდება.

ინგა რუგინიენემ ჟურნალისტებთან შეხვედრისას განაცხადა, რომ თანამდებობას ამაყად და მშვიდი გულით ტოვებს. ყოფილმა პრემიერ-მინისტრმა კატეგორიულად უარყო მოსაზრება, რომ ის საკუთარი გუნდის "პოლიტიკურ თამაშებს" შეეწირა. მისი განმარტებით, მინდაუგას სინკევიჩიუსს მთავრობის მეთაურის პოსტი ჯერ კიდევ გასულ წელს უნდა დაეკავებინა, თუმცა ეს პროცესი გარკვეული დროით გადავადდა.

ცნობისთვის, მიმდინარე საპარლამენტო ვადის განმავლობაში ლიეტუვაში სამთავრობო კაბინეტი ვადამდე უკვე მეორედ იცვლება. გასულ წელს ანალოგიური გადადგომა ყოფილი პრემიერ-მინისტრის, გინტაუტას პალუცკასის ბიზნესსაქმიანობის ირგვლივ დაწყებულმა გამოძიებამ გამოიწვია.