Log-in Georgia-ს ფარგლებში დარჩენილია 4500 კმ-ის ოპტიკურ-ბოჭკოვანი ინფრასტრუქტურის მშენებლობა - “ოუფენნეტი”

პროექტი Log-in Georgia გახანგრძლივდა და მისი დასრულება 2027 წლის ბოლოსთვის იგეგმება. ამის შესახებ „ოუფენნეტის“ ხელმძღვანელმა მარიამ სულაბერიძემ განაცხადა.

მისივე თქმით, დღეის მდგომარეობით უკვე დასრულებული და ოპერირებაშია 2 300 კილომეტრის სიგრძის ქსელი, ხოლო დარჩენილი ნაწილი ჯამში 4 500 კილომეტრამდე სრულად დაკონტრაქტებულია და ამ ეტაპზე პროექტირების პროცესი მიმდინარეობს.

"მოგეხსენებათ, პროექტი Log-in Georgia გახანგრძლივდა და 2027 წლის ბოლოს დასრულდება. დღეის მდგომარეობით დასრულებული და ოპერირებაშია 2300 კილომეტრი, ხოლო დარჩენილი ნაწილი, რომელიც ჯამში შეადგენს 4500 კილომეტრამდე, სრულად არის დაკონტრაქტებული და მიმდინარეობს პროექტირების ეტაპი. ვიმედოვნებთ, რომ უახლოეს მომავალში კონტრაქტორი კომპანიები მშენებლობის ეტაპზე გადავლენ და ვადებში დასრულდება სახელმწიფო ქსელის სრულად მშენებლობა. რაც ძალიან მნიშვნელოვანი არის როგორც ქვეყნის ასე ვთქვათ, ინტერნეტ ჰაბის ჩამოყალიბებაში და ასევე ძალიან მნიშვნელოვანია რეგიონალური ოპერატორების განვითარებისათვის და მათი გეგმების განხორციელებისთვის", - განაცხადა სულაბერიძემ.

გასულ წელს ცნობილი გახდა, რომ საყოველთაო ინტერნეტიზაციის პროექტის დასრულების თარიღი, რომელიც 2025 წლის 31 დეკემბერში იყო, ორი წლით გახანგრძლივდება, პროექტის ბიუჯეტი კი თითქმის 40 მლნ დოლარით იზრდება.

ევროკავშირთან ასოცირების ხელშეკრულებით ნაკისრი ვალდებულების ფარგლებში, 2015 წელს საქართველოს ეკონომიკის სამინისტროს მიერ ა(ა)იპ “ოუფენ ნეტი” დაფუძნდა, რომელსაც საქართველოში ინტერნეტის ფართოზოლიანი კავშირის პროექტის განხორციელება დაევალა. პროგრამა ინტერნეტიზაციისთვის საჭირო ინფრასტრუქტურის განვითარებასა და მაღალსიჩქარიანი ინტერნეტის ხელმისაწვდომ ფასად შეთავაზებას გულისხმობს. საყოველთაო ინტერნეტიზაციისთვის ინფრასტრუქტურული სამუშაოები 2020 წლიდან დაიწყო და ორ ეტაპად განხორციელდა, შემდეგ კი, 2021 წლიდან, სამშენებლო სამუშაოები Log-in Georgia-ს ფარგლებში, IBRD-ის სესხის საფუძველზე გაგრძელდა. გეგმის თანახმად, 2025 წლის ბოლოსთვის სულ 5000 კმ სიგრძის ოპტიკურ-ბოჭკოვანი მაგისტრალური ინფრასტრუქტურა უნდა აშენებულიყო.