ლონდონის საფონდო ბირჟა 24-საათიან ვაჭრობაზე გადასვლას გეგმავს

ლონდონის საფონდო ბირჟამ 2027 წლის პირველ ნახევარში ღამის ვაჭრობის ახალი პლატფორმის, LSE 24-ის გაშვების გეგმა ოფიციალურად წარადგინა. როგორც ირკვევა, ახალი სავაჭრო სივრცე საწყის ეტაპზე გაცვლით სავაჭრო პროდუქტებზე, მათ შორის ETF-ფონდებზე გავრცელდება. აღსანიშნავია, რომ აღნიშნული ნაბიჯი, შესაძლოა, მომავალში აქციებით 24-საათიანი ვაჭრობის დაწყების საფუძველი გახდეს.

როგორც ცნობილია, LSE 24 ძირითადი ბაზრისგან დამოუკიდებლად იფუნქციონირებს. ლონდონის საფონდო ბირჟის აღმასრულებელმა დირექტორმა, ჯულია ჰოგეტმა განაცხადა, რომ მომავალში პლატფორმაზე სხვა ფასიანი ქაღალდების, მათ შორის აქციების და ოფციონების განთავსებაც იგეგმება. მისივე თქმით, ეს გადაწყვეტილება როგორც ადგილობრივი საცალო ინვესტორების, ისე აზიის რეგიონის საერთაშორისო ინსტიტუციური კლიენტების მოთხოვნას უკავშირდება.

მნიშვნელოვანია ითქვას, რომ ტრადიციული ბირჟების მხრიდან სავაჭრო საათების გაფართოება კრიპტოვალუტებისა და სხვა ციფრული აქტივების სწრაფ ზრდას უკავშირდება. LSE-ის გარდა, სავაჭრო დროის გაზრდას სხვა გლობალური ფინანსური გიგანტებიც გეგმავენ. კერძოდ, Nasdaq-ი და Cboe დეკემბერში სამუშაო დღეებში ვაჭრობის 23 საათამდე გაზრდას აპირებენ.

განმარტებისთვის, LSE 24 ლონდონის დროით 17:00 საათიდან 07:50 საათამდე იმუშავებს. ამასთან, დღის დასკვნითი პროცესების განსახორციელებლად 18:30-დან 19:00 საათამდე 30-წუთიანი ტექნიკური პაუზა იმოქმედებს, ხოლო ძირითადი ბაზარი მუშაობას სტანდარტულ რეჟიმში, 08:00-დან 16:30 საათამდე გააგრძელებს.

შეგახსენებთ, ლონდონის საფონდო ბირჟა გაერთიანებული სამეფოს მთავარი ფინანსური ინფრასტრუქტურაა, რომელსაც London Stock Exchange Group-ი მართავს.