მალტის მთავრობამ მოქალაქეებისთვის ChatGPT Plus უფასო გახადა

მალტის მთავრობამ და OpenAI-მ ახალი შეთანხმება გააფორმეს, რომელიც ქვეყნის ყველა მოქალაქეს ChatGPT Plus-ის ფასიან ვერსიაზე ერთწლიან უფასო წვდომას სთავაზობს. როგორც ირკვევა, ეს არის ამერიკული ტექნოლოგიური კომპანიის პირველი მსგავსი პარტნიორობა ეროვნულ მთავრობასთან, რომელიც ქვეყანაში ხელოვნური ინტელექტის ცნობადობის ამაღლებას ისახავს მიზნად.

აღსანიშნავია, რომ უფასო გამოწერის მისაღებად, მალტის ონლაინ იდენტიფიკაციის სისტემაში რეგისტრირებულმა მოქალაქეებმა და რეზიდენტებმა უფასო ონლაინ კურსი უნდა გაიარონ. პროგრამის პირველი ფაზა მიმდინარე წლის მაისში ჩაეშვება, ხელმისაწვდომობის მართვას კი მალტის ციფრული ინოვაციების სააგენტო უზრუნველყოფს.

მნიშვნელოვანია ითქვას, რომ საგანმანათლებლო კურსი, სახელწოდებით „AI ყველასთვის“, მალტის უნივერსიტეტმა შეიმუშავა. აღნიშნული კურსი ადამიანებს იმის გაგებაში ეხმარება, თუ რა არის ხელოვნური ინტელექტი, რა შესაძლებლობები თუ შეზღუდვები აქვს მას და როგორ უნდა გამოიყენონ ის პასუხისმგებლობით პირად თუ სამუშაო გარემოში.

რაც შეეხება გლობალურ ტენდენციას, მალტის ეს ნაბიჯი იმ მზარდი მიდგომის ნაწილია, რომლის ფარგლებშიც სხვადასხვა ქვეყნის მთავრობები ხელოვნური ინტელექტის ყოველდღიურ საქმიანობაში გამოყენებისა და მოსახლეობაში ნდობის ამაღლების პრაქტიკულ გზებს ეძებენ.

ამ მხრივ გამონაკლისი არც ისლანდია ყოფილა, სადაც კომპანია Anthropic-მა გასულ წელს სპეციალური პროექტი წარადგინა. აღნიშნული ინიციატივა ისლანდიის ყველა მასწავლებლისათვის Claude AI-ზე წვდომის მიცემას ითვალისწინებდა, რაც მათ გაკვეთილების დაგეგმვასა და ადმინისტრაციულ საქმიანობაში ეხმარება.