მასკი, კუკი, ფინკი - კიდევ ვინ შეუერთდება დონალდ ტრამპის ჩინეთში დაგეგმილ ვიზიტს?

აშშ-ის პრეზიდენტმა, დონალდ ტრამპმა უმსხვილესი ამერიკული კომპანიების ხელმძღვანელები, მათ შორის ილონ მასკი, ტიმ კუკი და ლარი ფინკი, ჩინეთში დაგეგმილ სახელმწიფო ვიზიტზე მიიწვია.

თეთრი სახლის ოფიციალური წარმომადგენლის განმარტებით, დელეგაცია პრეზიდენტ სი ძინპინთან დაგეგმილ სამიტს დაესწრება. როგორც ირკვევა, პრეზიდენტი პეკინთან მნიშვნელოვანი ბიზნესგარიგებებისა და შესყიდვების შესახებ შეთანხმებების გაფორმებას გეგმავს.

არსებული ინფორმაციით, დელეგაციის შემადგენლობაში Tesla-ს აღმასრულებელი დირექტორი ილონ მასკი, Apple-ის ხელმძღვანელი ტიმ კუკი, BlackRock-ის მმართველი ლარი ფინკი და Boeing-ის გენერალური დირექტორი კელი ორტბერგი შედიან. სიაში ასევე Blackstone-ის სტივენ შვარცმანი, Citigroup-ის ჯეინ ფრეიზერი, Goldman Sachs-ის დევიდ სოლომონი და Meta Platforms-ის ხელმძღვანელი დინა პაუელ მაკკორმიკი ფიგურირებენ. საყურადღებოა, რომ Cisco-ს ხელმძღვანელმა, ჩაკ რობინსმა ვიზიტში მონაწილეობაზე უარი კომპანიის ფინანსური ანგარიშგების გრაფიკის გამო თქვა.

მნიშვნელოვანია ითქვას, რომ სამიტის დღის წესრიგი ვაჭრობის, ხელოვნური ინტელექტის, ექსპორტის კონტროლის, ტაივანის საკითხისა და ირანის ომის განხილვას მოიცავს. მხარეებს შორის მოლაპარაკებები ვაშინგტონსა და პეკინს შორის დაძაბულობის ესკალაციის ფონზე გაიმართება.

რაც შეეხება დელეგაციის მიღმა დარჩენილ პირებს, სიაში Nvidia-ს ხელმძღვანელი ჯენსენ ჰუანგი არ ფიგურირებს. თეთრი სახლის მიერ შედგენილ სიაში ასევე არ არიან General Motors-ის, Disney-სა და Alphabet-ის წარმომადგენლები.

შეგახსენებთ, რომ აშშ-სა და ჩინეთს შორის ურთიერთობები ბოლო კვირებში AI ტექნოლოგიების, სანქციებისა და იშვიათი მეტალების ექსპორტის გამო დაიძაბა.