მექსიკამ და ევროკავშირმა ახალი სავაჭრო შეთანხმება გააფორმეს
მექსიკამ და ევროკავშირმა ერთობლივად გამართულ სამიტზე თავისუფალი ვაჭრობის ახალ შეთანხმებას მოაწერეს ხელი. არსებული ინფორმაციით, ეს გადაწყვეტილება მიზნად ვაშინგტონზე ეკონომიკური დამოკიდებულების შემცირებას და დონალდ ტრამპის სატარიფო პოლიტიკისგან თავის დაცვას ისახავს.
Reuters-ის ცნობით, დოკუმენტს ხელი მექსიკის პრეზიდენტმა კლაუდია შეინბაუმმა, ევროკომისიის პრეზიდენტმა ურსულა ფონ დერ ლაიენმა და ევროპული საბჭოს პრეზიდენტმა ანტონიო კოშტამ მოაწერეს. ევროკავშირის საგარეო პოლიტიკის ხელმძღვანელმა, კაია კალასმა აღნიშნა, რომ ეს სამიტი მხოლოდ სავაჭრო ურთიერთობებს არ შეეხება და დასახელებული შეხვედრა მნიშვნელოვან გეოპოლიტიკურ გზავნილადაც იქცევა.
მექსიკის ეკონომიკის სამინისტროს პროგნოზით, ახალი შეთანხმება ევროკავშირში მექსიკური ექსპორტის მოცულობას 2030 წლისთვის $24 მილიარდიდან $36 მილიარდამდე გაზრდის. თავის მხრივ, ევროკავშირი მექსიკაში ყოველწლიურად $65 მილიარდის ღირებულების პროდუქციას გააგზავნის. აღსანიშნი ფაქტია, რომ ორმხრივი სავაჭრო ბრუნვა ბოლო ათწლეულში 75 პროცენტით გაიზარდა. როგორც ირკვევა, სავაჭრო ურთიერთობებში წამყვან პოზიციებს სატრანსპორტო აღჭურვილობა, მანქანათმშენებლობა, ქიმიკატები, საწვავი და მოპოვებითი მრეწველობის პროდუქტები იკავებენ.
ახალი ხელშეკრულება მნიშვნელოვნად გააფართოებს 2000 წელს გაფორმებულ შეთანხმებას, რომელიც მხოლოდ ინდუსტრიულ საქონელს მოიცავდა. განახლებული დოკუმენტი მომსახურების სფეროს, სახელმწიფო შესყიდვებს, ციფრულ ვაჭრობასა და სოფლის მეურნეობის პროდუქტებს გააერთიანებს. ახალი პირობების გათვალისწინებით, პრაქტიკულად ყველა სახის საქონელზე უბაჟო რეჟიმი იმოქმედებს. ეს საიმპორტო შეღავათი მექსიკურ სატაცურსა და ქათმის ხორცზე, ასევე ევროპულ რძის ფხვნილზე, ყველსა და ღორის ხორცზე გარკვეული კვოტების ფარგლებში გავრცელდება.
აღსანიშნავია, რომ სავაჭრო შეთანხმების ტექსტი ერთ წელზე მეტია მზად არის, თუმცა მისი ხელმოწერა ევროკავშირის პრიორიტეტების გამო ფერხდებოდა. აქვე უნდა ითქვას ისიც, რომ ბრიუსელმა გასული რვა თვის განმავლობაში მოლაპარაკებები ინდონეზიასთან, ინდოეთთან, ავსტრალიასთან და სამხრეთ ამერიკის ბლოკ Mercosur-თანაც დაასრულა.