მეტრო „სადგურის მოედნიდან“ „ვარკეთილამდე“ მგზავრებს დროებით ვერ ემსახურება - მიზეზები

თბილისის მეტროს პირველ (ახმეტელი-ვარკეთილის) ხაზზე მატარებლების მოძრაობა ტექნიკური ხარვეზის გამო ნაწილობრივ შეფერხებულია.

თბილისის მერიის ინფორმაციით, პრობლემა მეტროსადგურ „რუსთაველზე“ მატარებლის დაზიანებამ გამოიწვია. ამ დროისთვის მგზავრთა გადაყვანა მხოლოდ გარკვეულ მონაკვეთზე ხორციელდება.

„მგზავრებს ვემსახურებით მეტროსადგურ „ახმეტელის თეატრიდან“ „სადგურის მოედნამდე“. რაც შეეხება მეორე მონაკვეთს „სადგურის მოედნიდან“ „ვარკეთილამდე“, დროებით მგზავრების გადაყვანას ვერ ვახერხებთ“, - განუცხადეს bm.ge-ს მერიაში.

უწყების განმარტებით, შესაბამისი სამსახურები დაზიანებული შემადგენლობის ლიანდაგიდან გაყვანაზე მუშაობენ: „როგორც კი დაზიანებულ მატარებელს გადავიყვანთ ჩიხში, მოძრაობას სრულად განვაახლებთ“.