"მეწარმეთა შესახებ" კანონთან მიმართებით, რეესტრის პრაქტიკა არაერთგვაროვანი და არაგანჭვრეტადია - ზაქარია შველიძე
ბევრმა ბიზნესმა სადამფუძნებლო დოკუმენტების კანონთან შეუსაბამობის პროცესი დროულად ვერ დაასრულა, რამაც მძიმე სამართლებრივი და ფინანსური შედეგები გამოიწვია - ამის შესახებ BMG-სთან EY-ის იურიდიული პრაქტიკის Of Counsel-ი, ზაქარია შველიძე აცხადებს.
მისი განმარტებით, „მეწარმეთა შესახებ“ ახალი კანონის იმპლემენტაციის პროცესი ქართული ბიზნესისთვის გამოწვევა აღმოჩნდა, რადგან კომპანიებმა ერთი მხრივ, დაუდევრობა გამოიჩინეს და დოკუმენტაციის მოწესრიგება არ იჩქარეს.
„მართალია, კანონმდებელმა ვადა რამდენჯერმე გადაიწია, მაგრამ როგორც ჩანს, ახალ კანონთან შესაბამისობის უზრუნველყოფა ბიზნესისთვის გამოწვევა იყო - გარკვეულწილად, გადავადებას ბიზნესი გრძელვადიან პერსპექტივაში უყურებდა - რომ მოვახერხებ და გარკვეული ხნის შემდეგ მოვიყვან შესაბამისობაში. პირველ აპრილს კი, მოხდა ის, რომ კომპანიებს, რომლებმაც ვერ მოახერხეს სადამფუძნებლო დოკუმენტების კანონთან შესაბამისობის უზრუნველყოფა, საქმიანობა შეუჩერდათ. ეს საკმაოდ სერიოზული პრობლემა იყო, იმიტომ რომ დირექტორების ხელმძღვანელობითი უფლებამოსილებაც შეჩერდა, ასევე საბანკო ოპერაციების განხორციელება, საგადასახადო აქტივობები და ეს კომპანიისთვის საკმაოდ სერიოზული გამოწვევა იყო“, - აცხადებს ზაქარია შველიძე BMG-სთან.
მეორე მხრივ, იურისტის განმარტებით, პრობლემა იყო საჯარო რეესტრის მუშაობაზეც - ბოლო პერიოდში განაცხადების დიდმა ნაკადმა რეესტრის რესურსების გადატვირთვა გამოიწვია, რის გამოც დროული რეაგირება გართულდა. გარდა ამისა, გამოიკვეთა არაერთგვაროვანი პრაქტიკის ტენდენციაც.
„პირველი აპრილისთვის დიდი ნაკადი მივიდა და ფაქტობრივად, რეესტრსაც აღარ ჰქონდა შესაბამისი რესურსი, რომ ამდენ განაცხადზე რეაგირება დროულად მოეხდინა. თუმცა, რეესტრის პრაქტიკა, გულწრფელად რომ ვთქვათ, განჭვრეტადი ვერ არის. ამას კიდევ გარკვეული ობიექტური ახსნა შეიძლება ჰქონდეს, იმ თვალსაზრისით, რომ ბევრი აპლიკაცია, ბევრი განაცხადი არის წარდგენილი და როგორც ჩანს, რეესტრის რესურსი არ იყო ამისთვის მზად, რაც გარკვეულწილად გასაგებია.