Microsoft-მა და OpenAI-მ ექსკლუზიური თანამშრომლობა შეწყვიტეს
ამერიკული ტექნოლოგიური ინდუსტრიის გიგანტმა, Microsoft-მა და ხელოვნური ინტელექტის წამყვანმა სტარტაპმა OpenAI-მ რამდენიმე წლის წინ დადებულ გარიგებას გადახედეს და ექსკლუზიური შეთანხმება გააუქმეს. როგორც ირკვევა, ცვლილება მხარეებს შორის მზარდი დაძაბულობისა და მარეგულირებლების მხრიდან გაძლიერებული კონტროლის ფონზე განხორციელდა.
ახალი პირობებით Microsoft-ი OpenAI-ის შემოსავლის 20%-ს 2030 წლამდე მიიღებს, თუმცა გასაცემ თანხაზე კონკრეტული ლიმიტი დაწესდება. Microsoft-ი კვლავ დარჩება სტარტაპის მთავარ პარტნიორად და მის ინტელექტუალურ საკუთრებაზე წვდომას 2032 წლამდე ინარჩუნებს. სანაცვლოდ, OpenAI დამატებითი გამოთვლითი სიმძლავრეების მოზიდვას და ბაზარზე Anthropic-თან კონკურენციის გაძლიერებას შეძლებს. ამას გარდა, OpenAI აიღებს პასუხისმგებლობას, რომ 2032 წლამდე Microsoft-ის მონაცემთა ცენტრების მიმართულებით, კერძოდ Azure-ის სერვისებში $250 მილიარდს დახარჯავს.
ამ გადაწყვეტილებით OpenAI-ს შესაძლებლობა მიეცემა, საკუთარი ტექნოლოგიები Amazon-ისა და Google-ის პლატფორმებზეც განათავსოს. ცნობისთვის, აქამდე ChatGPT-ის მოდელების რეალიზაციის უფლება მხოლოდ Microsoft-ს ჰქონდა. Amazon-ის აღმასრულებელმა დირექტორმა, ენდი ჯასიმ უკვე დაადასტურა, რომ უახლოეს კვირებში OpenAI-ის მოდელები Amazon Web Services-ის მომხმარებლებისთვის ხელმისაწდომი გახდება. Barclays-ის ანალიტიკოსების შეფასებით, ეს ნაბიჯი Microsoft-ს კაპიტალის გამოთავისუფლებასა და ქლაუდ-ინფრასტრუქტურის გაფართოებაში დაეხმარება.
მნიშვნელოვანია ითქვას, რომ ექსკლუზიურობის გაუქმება Microsoft-ს ანტიმონოპოლიური გამოძიებების თავიდან აცილებაში შეუწყობს ხელი. როგორც ცნობილია, აშშ-ის, დიდი ბრიტანეთისა და ევროკავშირის მარეგულირებლები სწავლობდნენ, ხომ არ აძლევდა კომპანიას OpenAI-სთან დადებული შეთანხმება სხვა კონკურენტ AI კომპანიებთან უსამართლო უპირატესობას.
შეგახსენებთ, რომ Microsoft-მა OpenAI-ში 2019 წლიდან $13 მილიარდი ინვესტიცია განახორციელა. ამ თანამშრომლობამ სტარტაპს სფეროს პიონერად ჩამოყალიბებაში შეუწყო ხელი.