მიკრობანკებისთვის დაგეგმილი ცვლილებები მეტ მოთამაშეს შემოიყვანს ბაზარზე - ილია რევია

“კრისტალში” აცხადებენ, რომ მიკრობანკებისთვის რეგულაციების შემსუბუქება და საქმიანობის არეალის გაფართოება სექტორში კონკურენციას გაზრდის.

როგორც “კრისტალის” გენერალურმა დირექტორმა “საქმის კურსის” ეთერში განაცხადა, მიკრობანკებისთვის საკრედიტო პორტფელის კომპოზიციის შერბილება და ლიცენზიის პირობების გამარტივება სექტორში მეტი მოთამაშის შესვლასაც შეუწყობს ხელს.

“რეფორმას, თავისთავად, ძალიან პოზიტიურად ვაფასებთ. არის გარკვეული ნიუანსები, რომლებიც ამ რეფორმაში მოიცავს ლიცენზირების პროცესების უფრო გამარტივებულ მიდგომებსაც, რაც ალბათ უფრო მეტ მიკრობანკსაც შემოიყვანს ბაზარზე საბოლოო ჯამში.

[პორტფელის კომპოზიციის ცვლილება] უფრო დივერსიფიკაციას შეუწყობს ხელს და ასევე ახალი მოთამაშეების შემოსვლასაც ამ ბაზარზე, იმიტომ რომ 70% ბიზნეს და აგრო პორტფელის შექმნა არ არის მარტივი ამოცანა და ამისთვის სპეციალიზირებული ინსტიტუტი იყო. 50%-მდე ამ ლიმიტის დაწევა ალბათ კონკურენციას გააძლიერებს, რაც ბუნებრივია, მომხმარებლებზე მხოლოდ პოზიტიურად აისახება.

ვიცი, რომ მსხვილ მიკროსაფინანსო ორგანიზაციებში ამაზე [მიკრობანკების სექტორში გადასვლა] მსჯელობა მიმდინარეობდა და ალბათ ახლა მით უფრო გაგრძელდება ეს მსჯელობა, რადგანაც ბარიერი შემცირდება მათთვის. რაც შეეხება საერთაშორისო ინსტიტუტებს, ამ ეტაპზე ინფორმაცია, სამწუხაროდ, არ მაქვს, თუმცა საქართველო თავისთავად არის საინტერესო ამ მიმართულებით საფინანსო სექტორის განვითარების ტემპებით და ტრენდებით”, - განაცხადა ილია რევიამ.

ცნობისთვის, პარლამენტში ინიციირებული ცვლილებებით, მიკრობანკებისთვის რეგულაციები მარტივდება და საქმიანობის არეალი ფართოვდება. მიკრობანკებს უცხოურ ვალუტაში სესხების გაცემა შეეძლებათ, ერთ მსესხებელზე ან ურთიერთდაკავშირებულ მსესხებელთა ჯგუფზე დაკრედიტების მაქსიმალური ლიმიტი კი 1 მილიონიდან 2 მილიონ ლარამდე გაიზრდება.

ამასთან, სამეწარმეო მიზნებისთვის გაცემული სესხების მინიმალური წილი 70%-დან 50%-მდე შემცირდება, ხოლო ერთ მსესხებელზე ან ურთიერთდაკავშირებულ მსესხებელთა ჯგუფზე დაკრედიტების მაქსიმალური ლიმიტი ორმაგდება.