მიწოდება მოთხოვნაზე ორჯერ სწრაფად გაიზრდება - რას პროგნოზირებს Galt & Taggart-ი საოფისე უძრავი ქონების ბაზარზე?

თბილისში საოფისე უძრავი ქონების ჯამური ფართობი 1.9 მლნ კვ.მ-ს შეადგენს, საიდანაც გასაქირავებელი ბიზნეს ცენტრების წილი 19%-ია (358 ათასი კვ.მ.) - ამის შესახებ საინვესტიციო ბანკ Galt & Taggart-ის თბილისის საოფისე უძრავი ქონების ბაზრის კვლევის ანგრიშში ვკითხულობთ. დოკუმენტი სექტორის მიმდინარე დინამიკას, მოთხოვნა-მიწოდების ბალანსსა და მომდევნო წლების განვითარების პერსპექტივებს აფასებს.

კვლევის ძირითად მიგნებებსა და სექტორისთვის საჭირო რეკომენდაციებზე "საქმიანი დილას" ეთერში Galt & Taggart-ის სექტორული კვლევების უფროსმა ზუკა თავყელიშვილმა ისაუბრა.

მისი განმარტებით, პანდემიამდელ პერიოდთან შედარებით, თბილისის ბაზარზე საოფისე უძრავი ქონების მიწოდება საგრძნობლად გაიზარდა, თუმცა მოთხოვნამ მას მაინც გადაასწრო.

"რომ გადავხედოთ საოფისე ბაზარს 2019 წელს, საშუალო ვაკანტურობის დონე 10% გვქონდა, რაც საკმაოდ ჯანსაღი ნიშნულია. ამის შემდეგ, 2019-2025 წლებში, მიწოდება საკმაოდ სწრაფი ტემპით გაიზარდა და ზრდის ტემპი ჯამურად 56% იყო. ძირითადად, ეს იყო იმის გამო, რომ მაღალი კლასის ბიზნეს ცენტრების რაოდენობა, რაც 2019 წლამდე საკმაოდ ლიმიტირებული იყო ბაზარზე, მნიშვნელოვნად გაიზარდა, გასამმაგდა მათი მოცულობა. თუმცა მეორე მხარეს მოთხოვნას თუ შევხედავთ, ამავე პერიოდში მოთხოვნამ მიწოდების ზრდის ტემპებს გადააჭარბა", - განაცხადა ზუკა თავყელიშვილმა.

კვლევის თანახმად, 2019-2025 წლებში ბაზარზე მოთხოვნის ზრდამ 62% შეადგინა. თავყელიშვილის თქმით, ამ დინამიკის უკან ორი წამყვანი სექტორი იდგა – IT და ფინანსები.

"აქ ორი მთავარი სექტორი იყო, რამაც ეს გამოიწვია: ერთი იყო IT სექტორი, სადაც ამ პერიოდში 120%-ით იყო გაზრდილი დასაქმება, მეორე საფინანსო სექტორი – სადაც თითქმის 30%-იანი ზრდა გვქონდა. და შეგვიძლია ვთქვათ, რომ ამ ორი სექტორის ზრდამ აითვისა გაზრდილი მიწოდება. შესაბამისად, ვაკანტურობა 6.6%-მდე შეგვიმცირდა", - ამბობს ის.