მნიშვნელოვანი იქნება, თუ ფოსტის ბაზარს მთავრობა ხელუხლებელს დატოვებს - FedEx

“მნიშვნელოვანია თუ ამ ბაზარს ხელშეუხებელს დავტოვებთ”- საქართველოში კომპანიაა FedEx-ის წარმომადგენლობის დამფუძნებელს მიაჩნია, რომ საფოსტო და საკურიერო ბაზარს რეგულაცია არ სჭირდება. ასე ეხმაურება ის “ფოსტის შესახებ” წლებს წინ მომზადებული კანონპროექტის დღის წესრიგში დაბრუნებას.

აღნიშნული დოკუმენტი მიმდინარე საშემოდგომო სესიაზე პარლამენტის განსახილველ კანონპროექტთა ნუსხაშია შეტანილი.

საფოსტო რეფორმის ბოლო რედაქციის მიხედვით, საფოსტო სექტორი, რომელიც 2005 წლიდან ლიბერალიზებულია, კვლავ რეგულირებადი სექტორი გახდება, რასაც კერძო სექტორი არ ეთანხმება.

"ამ კანონპროექტთან ერთად გავზარდე. 13 წელია ამაზე მიდის ლაპარაკი, მაგრამ წელს უკვე საპარლამენტო კანონპროექტების სიაში შესულია ოფიციალურად და ალბათ მოგვიწევს ბიზნესს ამაზე მსჯელობა.

იმ ეტაპზე, რა ეტაპზეც შეწყდა კანონპროექტზე მუშაობა, არ იყო ის სასურველი ვერსია ჩვენთვის, თუმცა ძალიან ეფექტიანად გვემუშავებოდა სამინისტრო, უბრალოდ რაღაც რიგი მოვლენების გამო შეწყდა ეს მუშაობა. იმედს ვიტოვებ, რომ მთავრობა დაგვიბრუნდება ამ საკითხზე და ჩვენ აზრსაც მოისმენს.

იქ ძალიან ბევრი საკითხები იყო, რომელსაც არ ვეთანხმებოდით და რომელზედაც ვცდილობდით, რომ სხვა რედაქციით მოეწოდებინა სამინისტროს. დღემდე მიმაჩნია, რომ სწორი და ამოსავალი წერტილი უნდა იყოს მთავრობისთვის ის, რომ ბიზნესი არის სრულად ლიბერალიზებული.

ბაზარი არის სრულად ლიბერალიზებული. ბაზარზე კონკურენცია წარმოქმნის ახალ კომპანიებს და კონკურენცია კლავს კომპანიებს და არანაირი რეგულაცია ამას არ სჭირდება. თუ ბაზარზე არ არის რამე ისეთი სერიოზული რყევა, რის გამოც მთავრობას უნდა, რომ რეგულაცია შემოიღოს, მე ვფიქრობ, რომ ძალიან მნიშვნელოვანი იქნება, თუ ამ ბაზარს ხელუხლებელს დატოვებს მთავრობა”,- აცხადებს ნინო მენთეშაშვილი.