„მოდერნიზაცია არ უნდა მოხდეს ისტორიის ხარჯზე“ - რა გზავნილები გააჟღერა კობახიძემ ბაქოში მსოფლიო ურბანულ ფორუმზე
BM.GE|bm.ge
ირაკლი კობახიძე განცხადებით, საერთაშორისო პარტნიორების მხარდაჭერით საქართველო ეროვნული სივრცითი დაგეგმარებისა და განვითარების კონცეფციის განხორციელების პროცესში წინ მიიწევს, ხოლო დაბალანსებული ტერიტორიული განვითარება და თანამედროვე ურბანული დაგეგმარება ქვეყნის ეროვნული პოლიტიკის ერთ-ერთ მთავარ პრიორიტეტად რჩება.
ამის შესახებ ირაკლი კობახიძემ მსოფლიო ურბანული ფორუმის მე-13 სესიაზე სიტყვით გამოსვლისას განაცხადა.
პრემიერის თქმით, ეროვნული სივრცითი დაგეგმარებისა და განვითარების კონცეფცია საბინაო და ურბანული განვითარების მნიშვნელოვან საფუძველს ქმნის და ქვეყნის ყველა რეგიონში დაბალანსებულ და მდგრად განვითარებას ემსახურება.
„საერთაშორისო პარტნიორების მხარდაჭერით, საქართველო წინ მიიწევს ეროვნული სივრცითი დაგეგმარებისა და განვითარების კონცეფციის განხორციელების პროცესში. ეს მნიშვნელოვანი დოკუმენტი წარმოადგენს საბინაო და ურბანული განვითარების მნიშვნელოვან საფუძველს, უზრუნველყოფს სივრცის ჰარმონიულ ინტეგრაციას, რაც ჩვენს ერთგულებაზე მეტყველებს დაბალანსებული და მდგრადი განვითარების იდეისადმი ქვეყნის ყველა რეგიონში“.
მისივე თქმით, რეფორმების ეფექტიანად განხორციელებისთვის მთავრობამ ცენტრალური ხელისუფლების სისტემაში სპეციალიზებული სააგენტოს მეშვეობით ინსტიტუციური კოორდინაცია გააძლიერა.
„ამ რეფორმების ეფექტური განხორციელების უზრუნველსაყოფად, გავაძლიერეთ ინსტიტუციური კოორდინაცია ცენტრალური მთავრობის სისტემაში შემავალი სპეციალიზებული სააგენტოს მეშვეობით. ეს მექანიზმი მხარს უჭერს გრძელვადიან დაგეგმვას და ხელს უწყობს იმის უზრუნველყოფას, რომ ურბანული ტრანსფორმაცია წარიმართოს სტრატეგიული ხედვით, უწყვეტობითა და ეფექტური მმართველობით“.
პრემიერ-მინისტრის შეფასებით, მდგრადი ქალაქი მხოლოდ ინფრასტრუქტურით არ განისაზღვრება და აუცილებელია სოციალური, დემოგრაფიული და გარემოსდაცვითი გამოწვევების გათვალისწინებაც.
„ამავდროულად ვაღიარებთ, რომ მდგრადი ქალაქი არ განისაზღვრება მხოლოდ ფიზიკური ინფრასტრუქტურით. ის უნდა რეაგირებდეს სოციალურ რეალობაზეც, დემოგრაფიულ ცვლილებებსა და ახალ გარემოსდაცვით გამოწვევებზეც. თანამედროვე ურბანული მდგრადობა მოითხოვს ხელმისაწვდომ საჯარო სერვისებს, მდგრად მობილობას, კლიმატის ცვლილებაზე ორიენტირებულ სივრცით მოწყობასა და პოლიტიკას, რომელიც აუმჯობესებს ყველა თემის ცხოვრების ხარისხს“.
ირაკლი კობახიძის თქმით, ბოლო წლებში საქართველოს ძლიერი ეკონომიკური ზრდის პარალელურად ტერიტორიული განვითარება და თანამედროვე ურბანული პოლიტიკა ეროვნული პრიორიტეტი გახდა.
„ბოლო წლებში, საქართველოს ძლიერ ეკონომიკურ ზრდასთან ერთად, დაბალანსებული ტერიტორიული განვითარება და თანამედროვე ურბანული დაგეგმარება ჩვენი ეროვნული პოლიტიკის ძირითად პრიორიტეტებად იქცა. ჩვენი მიზანია არა მხოლოდ ინფრასტრუქტურის გაფართოება და ცხოვრების ხარისხის გაუმჯობესება, არამედ იმის უზრუნველყოფა, რომ ზრდა დარჩეს მდგრადი, რეგიონულად დაბალანსებული და ორიენტირებული იყოს ჩვენი მოქალაქეების საჭიროებებზე“.
მისივე განცხადებით, საქართველოს ერთ-ერთი მნიშვნელოვანი მიღწევა ეროვნული საკადასტრო აღრიცხვის დასრულება და მიწის ნაკვეთების სრული რეგისტრაცია გახდა.
„საქართველოს ერთ-ერთი ყველაზე მნიშვნელოვანი ბოლოდროინდელი მიღწევა იყო ეროვნული საკადასტრო აღრიცხვის დასრულება და მიწის ნაკვეთების სრული რეგისტრაცია მთელი ქვეყნის მასშტაბით. ამ რეფორმამ გააძლიერა სამართლებრივი საფუძველი, გააუმჯობესა მიწის რესურსის ადმინისტრირება და უფრო გამჭვირვალე საფუძველი შექმნა ეკონომიკური საქმიანობისა და ტერიტორიული მმართველობისთვის“.
პრემიერის თქმით, პარალელურად დასრულდა საბჭოთა პერიოდში გამოყოფილი საცხოვრებელი ფართების პრივატიზაციაც.
„პარალელურად, საბჭოთა პერიოდში გამოყოფილი საცხოვრებელი ფართის პრივატიზაცია დასრულდა. ამ ერთეულების სრულად კერძო საკუთრებაში გადაცემით ურბანული სტაბილურობისა და ინდივიდუალური საკუთრების უფლების განსაზღვრული ჩარჩო შევქმენით“.
კობახიძემ ასევე ისაუბრა დევნილთა მხარდაჭერის პროგრამებზე და აღნიშნა, რომ მთავრობა აგრძელებს ახალი დასახლებების განვითარებას.
„ჩვენი ურბანული და საბინაო პოლიტიკის ცენტრში რჩება ჩვენი ხალხის კეთილდღეობა. ათწლეულების განმავლობაში საქართველო აგრძელებდა ომისა და ოკუპაციის ჰუმანიტარული შედეგების მოგვარებას საქართველოს ოკუპირებული ტერიტორიებიდან იძულებით გადაადგილებული პირებისთვის საცხოვრებლისა და სოციალური დახმარების მიწოდებით. ვაგრძელებთ ახალი დასახლებების განვითარებას და საცხოვრებელი ფართის გადაცემას დაზარალებული ოჯახებისთვის, როგორც ჩვენი გრძელვადიანი ვალდებულების ნაწილი ღირსეული ცხოვრების პირობებისა და სოციალური ინკლუზიის მიმართ“.
კობახიძე ამბობს, რომ განსაკუთრებული ყურადღება ეთმობა რეგიონების თანაბარ განვითარებას, მათ შორის სოფლისა და მაღალმთიანი რეგიონების მხარდაჭერას.
„ჩვენი პოლიტიკა პრიორიტეტს ანიჭებს ასევე ახალგაზრდა ოჯახების, ეკომიგრანტებისა და მთიანი რეგიონების მოსახლეობის მხარდაჭერას. მიზნობრივი სახელმწიფო პროგრამებისა და ინოვაციური ფინანსური მექანიზმების მეშვეობით, ვცდილობთ, გავაუმჯობესოთ საცხოვრებლის ხელმისაწვდომობა და განვითარების თანაბარი შესაძლებლობები შევქმნათ საქართველოს ყველა რეგიონში“.
პრემიერის თქმით, მთავრობა ტრადიციული ქართული არქიტექტურული მემკვიდრეობის დაცვასაც განსაკუთრებულ მნიშვნელობას ანიჭებს.
„ქალაქი იდენტობის ე.წ. ჭურჭელია. ჩვენი ინიციატივები ტრადიციული ქართული არქიტექტურული მემკვიდრეობის შენარჩუნებისადმი ერთგულების იდეას ეფუძნება. გვჯერა, რომ მოდერნიზაცია არ უნდა მოხდეს ისტორიის ხარჯზე. ტრადიციული არქიტექტურული ელემენტების თანამედროვე ურბანულ დაგეგმარებაში ინტეგრირებით ვადასტურებთ ჩვენს კულტურულ უსაფრთხოებას, ვაშენებთ ქალაქებს, რომლებიც პატივს სცემენ ჩვენს წარსულს და ამავდროულად ფუნქციონირებენ ჩვენი მომავლისთვის“.
მისივე თქმით, საქართველოს მთავრობა გაეროსა და საერთაშორისო პარტნიორებთან ერთად რეგიონებს შორის უთანასწორობის შემცირებაზე მუშაობს.
„გაერთიანებული ერების ორგანიზაციასთან და საერთაშორისო პარტნიორებთან მჭიდრო თანამშრომლობით, საქართველოს მთავრობა აქტიურად მუშაობს ქვეყნის ყველა რეგიონში უფრო დაბალანსებული და ინკლუზიური განვითარების ხელშეწყობაზე. განსაკუთრებული აქცენტი კეთდება იმის უზრუნველყოფაზე, რომ სოფლისა და მაღალმთიანი რეგიონების მოსახლეობამ თანაბრად ისარგებლოს თანამედროვე ინფრასტრუქტურით, ხარისხიანი საზოგადოებრივი სერვისებით და ახალი ეკონომიკური შესაძლებლობებით“.
ირაკლი კობახიძის განცხადებით, საქართველო ერთგული რჩება მდგრადი განვითარების მიზნებისა და ახალი ურბანული დღის წესრიგის განხორციელების მიმართ.
„საქართველო მტკიცედ რჩება ერთგული მდგრადი განვითარების მიზნებისა და ახალი ურბანული დღის წესრიგის განხორციელების მიმართ. მზად ვართ, კიდევ უფრო გავაძლიეროთ თანამშრომლობა ჩვენს საერთაშორისო პარტნიორებთან ამჟამინდელი და მომავალი თაობებისთვის უსაფრთხო, ინკლუზიური და მდგრადი ადამიანური დასახლებების ხელშეწყობის მიზნით,“ - განაცხადა პრემიერ-მინისტრმა.
