მოსკოვის ნავთობგადამამუშავებელმა ქარხანამ მუშაობა სრულად შეაჩერა

უკრაინული დრონების შეტევების შედეგად გაჩენილი ხანძრის გამო, „გაზპრომნეფტის“ მფლობელობაში არსებულმა მოსკოვის ნავთობგადამამუშავებელმა ქარხანამ ნედლი ნავთობის გადამუშავება სრულად შეაჩერა.

არსებული ინფორმაციით, 20 სექტემბერს განხორციელებული თავდასხმისას ცეცხლი ქარხნის ორ მთავარ დანადგარს გაუჩნდა. ინფორმირებული წყაროების ცნობით, დაზიანებული ინფრასტრუქტურის შეკეთებასა და აღდგენას შესაძლოა რამდენიმე კვირა ან თვე დასჭირდეს.

საყურადღებოა, რომ მოსკოვის ნავთობგადამამუშავებელმა ქარხანამ სერიოზული დაზიანებები მიმდინარე წლის 16 და 18 ივნისს განხორციელებული დრონების შეტევების დროსაც მიიღო, რის გამოც ობიექტი სარემონტო სამუშაოებისთვის დროებით უკვე იყო გაჩერებული. უკრაინული მხარის განცხადებით, რუსეთის ენერგეტიკულ ინფრასტრუქტურაზე შეტევები იქამდე გაგრძელდება, სანამ რუსეთის ომს არ შეწყვეტს.

რაც შეეხება საწარმოს მასშტაბებს, მოსკოვის ქარხანა წელიწადში 14 მილიონ მეტრულ ტონა ნედლ ნავთობს ამუშავებს და რუსეთის ათ უდიდეს საწარმოს შორის შედის. Reuters-ის მონაცემებით, 2024 წელს მოსკოვის ქარხანამ 2.9 მილიონი ტონა ბენზინი, 3.2 მილიონი ტონა დიზელის საწვავი, 2 მილიონი ტონა მაზუთი და 1.3 მილიონი ტონა გუდრონი აწარმოვა.