მსოფლიო ბანკი ვარაუდობს, რომ 2026 წელს ენერგორესურსების ფასები 24%-ით გაიზრდება

მსოფლიო ბანკი ვარაუდობს, რომ 2026 წელს ენერგორესურსების ფასები 24%-ით გაიზრდება, რისი მიზეზიც ახლო აღმოსავლეთში მიმდინარე ომი იქნება. ორგანიზაციის პროგნოზით, ეს მაჩვენებელი ბოლო ოთხი წლის განმავლობაში ყველაზე მაღალი იქნება. როგორც ირკვევა, საბაზისო სცენარი კონფლიქტის მწვავე ფაზის მაისში დასრულებას ითვალისწინებს.

მსოფლიო ბანკში ასევე აქვთ მოლოდინი, რომ ომის გამო საერთო სასაქონლო ფასების ინდექსი 16%-ით გაიზრდება. თუმცა აღნიშნავენ, რომ რეგიონში ვითარების ესკალაციამ და მიწოდების დამატებით შეფერხებამ შესაძლოა ფასები კიდევ უფრო გაზარდოს.

როგორც ირკვევა, ენერგეტიკული კრიზისის მთავარი მიზეზი ჰორმუზის სრუტის ბლოკირებაა. საუბარია სტრატეგიულ სანაოსნო მონაკვეთზე, სადაც ყოველდღიურად მსოფლიო ნავთობის 20-25% გადიოდა. მსოფლიო ბანკის შეფასებით, ნავთობის მიწოდების ამჟამინდელი შეფერხება ისტორიაში ყველაზე მასშტაბურია და მსგავსი ენერგეტიკული შოკი კაცობრიობას არასდროს უნახავს. ორგანიზაცია ვარაუდობს, რომ სრუტეში გადაზიდვების მოცულობა ომამდელ ნიშნულს მხოლოდ ოქტომბერში დაუბრუნდება.

მსოფლიო ბანკში საუბრობენ იმაზეც, რომ ენერგორესურსების გაძვირება აისახება სასუქების ბაზარზეც, სადაც 31%-იანი ზრდაა მოსალოდნელი. განსაკუთრებით რთული ვითარებაა შარდოვანას შემთხვევაში, რომლის ფასმაც 60%-ით უკვე მოიმატა. სიცხადისთვის, ამ მხრივ ფასების ზრდა საფრთხეს პირდაპირ უქმნის სურსათის მიწოდებას და ფერმერების შემოსავლებს.

მსოფლიო ბანკის მთავარმა ეკონომისტმა, ინდერმიტ გილმა აღნიშნა, რომ ომი გლობალურ ეკონომიკას რამდენიმე მიმართულებით აზიანებს. მისი თქმით, პირველადი მიმართულება ენერგორესურსების დეფიციტი და გაზრდილი ფასებია, რასაც სურსათის გაძვირება და მაღალი ინფლაცია მოსდევს.

იგი მიიჩნევს, რომ ეს ჯაჭვური რეაქცია საპროცენტო განაკვეთებს გაზრდის და ვალების მომსახურებას კიდევ უფრო გაართულებს. მისი თქმით, აღნიშნული პროცესი ყველაზე მძიმედ იმ ღარიბ ქვეყნებზე აისახება, რომლებიც უკვე დგანან მაღალი საგარეო ვალის პრობლემის წინაშე.