მსოფლიო ბაზარზე საავიაციო საწვავი კვლავ ძვირდება

საჰაერო ტრანსპორტის საერთაშორისო ასოციაციის (IATA) ინფორმაციით, წინა კვირასთან შედარებით, საავიაციო საწვავზე ფასი 1%-ით გაიზარდა და ბარელზე 181 დოლარი შეადგინა. ეს მიმდინარე კვირის საშუალო მაჩვენებელია, თუმცა წინა წელთან შედარებით, საწვავის ღირებულება გაორმაგებულია.

ფასი განსხვავდება რეგიონების მიხედვით და მაგალითად აზიასა და ევროპაში ბარელის ფასი 187 დოლარს აღწევს. ჩრდილოეთ ამერიკაში საშუალო ფასი უფრო ნაკლები 176 დოლარია.

გაძვირებული საწვავის გამო, გლობალური ავიაცია კრიზისშია, რადგან ავიაკომპანიების ხარჯების 40%-ზე მეტი სწორედ საწვავზე მოდის. საწვავის დაზოგვის მიზნით, ევროპის ერთ-ერთ ყველაზე მსხვილ ავიაკომპანიას Lufthansa-ს 20 ათასამდე რეისის გაუქმებაც მოუწია.

არც პროგნოზებია სახარბიელო. საჰაერო ტრანსპორტის საერთაშორისო ასოციაციის ხელმძღვანელი ამბობს, რომ ჰორმუზის სრუტის საკითხი რომც მოგვარდეს, ლოგისტიკური ჯაჭვების აღდგენას თვეები დასჭირდება. ეს ნიშნავს, რომ ავიაციისთვის ყველაზე აქტიურ ზაფხულის პერიოდში სექტორი კრიზისში იქნება.

ვრცლად ამ თემაზე: გაორმაგებული ფასი საწვავზე - როგორ აისახა გლობალური კრიზისი ქართულ საავიაციო ბაზარზე?