მსოფლიოს უდიდესი ეკონომიკა აშშ აღარ არის? – PPP რეიტინგი

საერთაშორისო სავალუტო ფონდის პროგნოზების თანახმად, ნომინალური მთლიანი შიდა პროდუქტის (მშპ) მიხედვით, აშშ გლობალურად ისევ უცვლელად პირველ ადგილს ინარჩუნებს და მისი მაჩვენებელი 2026 წლისთვის $32.4 ტრილიონს მიაღწევს. ბუნებრივად, მეორე პოზიციას ჩინეთი $20.9 ტრილიონით იკავებს, მესამე ადგილზე კი $5.5 ტრილიონით გერმანია იმყოფება.

თუმცა რაც შეეხება მსყიდველობითი უნარის პარიტეტის (PPP) მიხედვით კორექტირებულ მაჩვენებელს, რომელიც ქვეყნებს შორის ცხოვრების ღირებულებასა და ადგილობრივ ფასებს ათანაბრებს, ლიდერთა რეიტინგი არსებითად იცვლება. ამ მონაცემებით, ჩინეთმა აშშ-ს ჯერ კიდევ 2014 წელს გაუსწრო, 2026 წლის პროგნოზით კი ჩინეთის ეკონომიკა $44.3 ტრილიონს მიაღწევს, რაც აშშ-ის მაჩვენებელზე $10 ტრილიონით მეტი იქნება. აღსანიშნავია, რომ განვითარებადი ქვეყნების რეიტინგში დაწინაურება დაბალი ადგილობრივი ფასებით არის განპირობებული, რადგან იდენტური მოცულობის თანხით ჩინეთსა თუ ინდოეთში უფრო მეტი საქონლისა და მომსახურების შეძენაა შესაძლებელი, ვიდრე აშშ-ში. სწორედ ამ კორექტირების შედეგად, ინდოეთი მსყიდველობითი უნარის პარიტეტით $18.9 ტრილიონით მსოფლიოს მესამე უმსხვილეს ეკონომიკად მიიჩნევა.

მნიშვნელოვანია ითქვას, რომ ორივე მაჩვენებელს ეკონომიკურ ანალიზში დამოუკიდებელი დანიშნულება აქვს. მსყიდველობითი უნარის პარიტეტით შედგენილი რეიტინგები ცხადყოფს, თუ სად არის საქონლისა და მომსახურების წარმოება ან შეძენა შედარებით იაფი, რაც შიდა ეკონომიკური აქტივობისა და ცხოვრების დონის შესაფასებლად გამოსადეგ ინსტრუმენტს წარმოადგენს. თუმცა ფინანსური ბაზრების მასშტაბის, საერთაშორისო ვაჭრობისა და გლობალური ეკონომიკური გავლენის განსასაზღვრად ანალიტიკოსებისთვის პრიორიტეტულ ინდიკატორად კვლავ ნომინალური მშპ რჩება, რომლის მიხედვით, აშშ ისევ #1.

მსყიდველობითი უნარის პარიტეტის (PPP) მიხედვით რეიტინგი ასეთია: 1. ჩინეთი - $44.3 ტრლნ

2. აშშ - $32.4 ტრლნ

3. ინდოეთი - $18.9 ტრლნ

4. რუსეთი - $7.5 ტრლნ

5. იაპონია - $7.3 ტრლნ