მსოფლიოში ნავთობი იაფდება - როდის აისახება ეს ქართულ ბაზარზე?
აშშ-სა და ირანს შორის სამშვიდობო შეთანხმებაზე განცხადებების ფონზე მსოფლიო ბაზარზე ნავთობი იაფდება.
Brent-ის ტიპის საწვავზე ფასი გარკვეული პერიოდი 80 დოლარსაც ჩამოსცდა, ასევე გაიაფებულია ამერიკული WTI, ხოლო რუსულ Urals-ზე კლება თვიურ ჭრილში 30%-ს აჭარბებს. საერთო ჯამში, მაისში დაფიქსირებულ პიკურ მაჩვენებელთან შედარებით, ნავთობი საშუალოდ დაახლოებით 40%-ით არის გაიაფებული.
კლების მიზეზი ბაზრის მოლოდინია, რომ ჰორმუზის სრუტე, რომლის გავლითაც მსოფლიოს ნავთობის მეხუთედი მიეწოდება, სრულად ამუშავდება. შესაბამისად, მიწოდებაში ის პრობლემები აღარ იქნება, რაც 28 თებერვლის შემდეგ გაჩნდა, როცა აშშ-მა და ისრაელმა ირანის წინააღმდეგ ფართომასშტაბიანი სამხედრო ოპერაცია დაიწყეს.
საქართველოში, რომელიც სრულად იმპორტირებულ საწვავს მოიხმარს, ფასს პლაცი განსაზღვრავს. ამიტომ ქვეყანაში საწვავის გაძვირება მყისიერად მარტიდანვე მოხდა. ბენზინზე ფასი საშუალოდ 60 თეთრით, ხოლო დიზელზე უფრო მეტად დაახლოებით 1.2 ლარით მოხდა.
პლაცზე ფასის კლების ფონზე BMG-მ იმპორტიორებს ჰკითხა როდიდან გაიაფდება ქვეყანაში საწვავი. ნავთობიმპორტიორები ამბობენ, რომ ფასის კლებას მომხმარებელი უახლოეს პერიოდში უნდა ელოდოს.
ვისოლის დირექტორი ამბობს, რომ დიზელის ტიპის საწვავზე უფრო დიდი კლებაა მოსალოდნელი, ვიდრე ბენზინზე, რადგან დიზელი უფრო მეტად არის გაძვირებული.
"მარტის თვიდან დაფიქსირდა საკმაოდ მაღალი ნიშნული ნავთობპროდუქტებზე. ჩვენ დინამიკაში ვახდენდით ეტაპობრივად ფასების ცვლილებას ზრდის თვალსაზრისით. თუმცა საბედნიეროდ დაფიქსირდა უკვე ცვლილება კლებისკენ. პროდუქტის იმპორტი ეტაპობრივად ხორციელდება და იმედი გვაქვს, რომ უახლოეს დღეებში განსაკუთრებით ეს შეეხება დიზელს, იმიტომ რომ ბენზინზე ფასი ისე არ გაიზარდა, როგორც დიზელზე. შესაბამისად, ცვლილების ყველაზე დიდი წილი ამ შემთხვევაში კლების კუთხით იქნება დიზელზე. ეტაპობრივად უახლოეს დღეებში ჯერ დიზელზე დავიწყებთ ფასების ცვლილებას", - ამბობს ვასილ ხორავა.