მთავრობა 2026 წლის ბიუჯეტის ზრდას გეგმავს - ცვლილებები პარლამენტს მომდევნო კვირაში წარედგინება

2026 წლის პირველი ცხრა თვის მდგომარეობით, სახელმწიფო ბიუჯეტის შემოსავლების შესრულება დაგეგმილ მაჩვენებელს დაახლოებით 800 მლნ ლარით აჭარბებს. დამატებითი შემოსავლების გათვალისწინებით, ფინანსთა სამინისტრო 2026 წლის ბიუჯეტში ცვლილებებს ამზადებს, რომლის წარდგენაც პარლამენტისთვის, სავარაუდოდ, მომდევნო კვირაში იგეგმება - ამის შესახებ ფინანსთა მინისტრის მოადგილემ, გიორგი კაკაურიძემ პარლამენტში, 2026 წლის ბიუჯეტის 9 თვის შესრულების ანგარიშის წარდგენისას კომიტეტების გაერთიანებულ სხდომაზე განაცხადა.

მისი ინფორმაციით, იანვარ-სექტემბერში ნაერთი ბიუჯეტის შემოსავლებმა 22 მლრდ 956 მლნ ლარზე მეტი შეადგინა, რაც გეგმის 104.7%-ია. უშუალოდ სახელმწიფო ბიუჯეტის შემოსავლები კი 19 მლრდ 226 მლნ ლარს შეადგენს.

„როგორც აღვნიშნე, მხოლოდ სახელმწიფო ბიუჯეტის ნაწილში შემოსავლები დაახლოებით 800 მილიონი ლარით არის გადაჭარბებული. ეს ზრდა უკვე ასახული იქნება იმ ცვლილებებში, რომლებიც სახელმწიფო ბიუჯეტში შევა. შესაბამისად, დამატებით მიღებული შემოსავლები დროებით ნაშთში აისახება, ვინაიდან ბიუჯეტში ცვლილების შეტანის გარეშე ზედმეტად შემოსული თანხის დახარჯვა შეუძლებელია. სწორედ ამიტომ არის ამ ეტაპზე ნაშთი გაზრდილი“, - განაცხადა კაკაურიძემ.

მისივე თქმით, ბიუჯეტის ცვლილებები ითვალისწინებს ცალკეული მიმართულებებისთვის დამატებითი თანხების გამოყოფას. ამასთან, იმ პროექტებში, სადაც თანხების ეკონომია ან აუთვისებლობაა, რესურსი სხვა, უფრო მაღალი ათვისების მქონე პროექტებზე გადანაწილდება.

კაკაურიძის განმარტებით, 2026 წლის პირველი ცხრა თვის განმავლობაში სახელმწიფო ბიუჯეტის ხარჯვითი ნაწილის შესრულებამ 21 მლრდ 40 მლნ ლარი შეადგინა, რაც 9 თვის საპროგნოზო მაჩვენებლის 92.4%-ია.

მისივე თქმით, ბიუჯეტის ცვლილებები ითვალისწინებს როგორც დაფინანსების ზრდას, ისე ცალკეული პროექტებისთვის თანხების გადანაწილებას. კერძოდ, იმ მიმართულებებზე, სადაც ათვისების მაჩვენებელი მაღალია, შესაძლოა დამატებითი რესურსები გამოიყოს. ამასთან, დაფინანსება შეიძლება მიემართოს ისეთ პროექტებსაც, რომელთა სრულად დაფინანსება 2027 წლის ბიუჯეტში არსებული რესურსის შეზღუდვის გამო ვერ მოხერხდა, რათა მათი განხორციელება მომდევნო წელს იყოს შესაძლებელი.