მთავრობა ძეხვეულის ეტიკეტირების წესს ამკაცრებს - რა იცვლება მომხმარებლისთვის

მთავრობამ მომხმარებლისთვის სურსათის შესახებ ინფორმაციის მიწოდების ტექნიკურ რეგლამენტში ცვლილებები შეიტანა, რომელიც ძეხვეულის (სოსისი, სარდელი, ძეხვი) ეტიკეტირების წესს ამკაცრებს.

ირაკლი კობახიძის მიერ ხელმოწერილი დადგენილების თანახმად, ცვლილება მიზნად ისახავს მომხმარებლის უკეთ ინფორმირებას და შეფუთვაზე არასწორი წარწერების პრევენციას.

ახალი წესის მიხედვით, ძეხვეულის შეფუთვის ხედვის ძირითად არეალში (ანუ წინა მხარეს, სადაც მომხმარებელი პროდუქტს პირველად ხედავს) კონკრეტული ცხოველის ხორცის დასახელების (მაგალითად: „საქონლის სოსისი“, „ღორის ძეხვი“) მითითება დასაშვები იქნება მხოლოდ იმ შემთხვევაში, თუ ამ ხორცის რაოდენობა გამოყენებული ხორცის საერთო მასის 50%-ზე მეტს შეადგენს.

კიდევ ერთი მნიშვნელოვანი დაზუსტება ეხება თავად ხორცის ცნებას: რეგლამენტში აღნიშნული ტერმინი „ცხოველების ხორცი“ არ მოიცავს ე.წ. „მექანიკურად განცალკევებულ ხორცს“. ეს ნიშნავს, რომ 50%-იანი ბარიერის დაანგარიშებისას მექანიკურად დამუშავებული მასა მხედველობაში არ მიიღება.

მთავრობის №301 დადგენილებაში შესული ეს ცვლილება დაუყოვნებლივ არ ამოქმედდება. მწარმოებლებსა და იმპორტიორებს ახალ სტანდარტზე გადასასვლელად გარკვეული დრო ეძლევათ დადგენილება ძალაში 2027 წლის 1 იანვრიდან შევა.