მთავრობა რეგიონებში მიუსაფარი ძაღლების იდენტიფიცირებისთვის 102,092 მიკროჩიპს ყიდულობს

გარემოს დაცვისა და სოფლის მეურნეობის სამინისტროს სურსათის ეროვნული სააგენტო, რომელსაც რეგიონებში ქუჩის ძაღლების და კატების კონტროლი და მონიტორინგი ევალება, ყიდულობს 102,092 ერთეულ ძაღლის საიდენტიფიკაციო მიკროჩიპს. შესაბამისად, ერთი ჩიპის სატენდერო ღირებულება 4.25 ლარს შეადგენს. ამასთან, უწყება 341 ერთეული წამკითხველი მოწყობილობის შესყიდვასაც გეგმავს.

სატენდერო დოკუმენტაციის მიხედვით, მიკროჩიპები განკუთვნილია ძაღლების კანქვეშ იმპლანტაციისთვის და უნდა აკმაყოფილებდეს ISO 11784/11785 საერთაშორისო სტანდარტებს. ტექნიკური მოთხოვნების თანახმად, ჩიპი უნდა იყოს ანტიმიგრაციული, ბიოშუშის კაფსულაში მოთავსებული, წყალგაუმტარი და კოროზიისგან დაცული. თითოეულ მიკროჩიპს უნდა ჰქონდეს უნიკალური 15-ნიშნა საიდენტიფიკაციო კოდი.

დოკუმენტაციაში აღნიშნულია, რომ მიკროჩიპები პასიურ RFID ტექნოლოგიაზე მუშაობს და არ შეიცავს ბატარეას. მათი წაკითხვა სპეციალური სკანერით საშუალოდ 3-10 სანტიმეტრის მანძილიდან იქნება შესაძლებელი. სააგენტო ასევე ითხოვს, რომ პროდუქცია გამოყენებული იყოს ევროკავშირის წევრ ქვეყნებში, აშშ-ში, კანადაში, ავსტრალიაში, იაპონიასა და სხვა ჩამოთვლილ სახელმწიფოებში, ან ჰქონდეს ცხოველთა აღრიცხვიანობის საერთაშორისო კომიტეტის (ICAR) სერტიფიკატი.

ტენდერის პირობებით, მიმწოდებელმა უნდა უზრუნველყოს მიკროჩიპების სტერილურ ერთჯერად შპრიცებთან ერთად მიწოდება. თითოეულ ჩიპს უნდა ახლდეს სამი წებვადი სტიკერი, რომელზეც დატანილი იქნება შესაბამისი შტრიხკოდი.

დოკუმენტაციის თანახმად, სააგენტო უფლებამოსილია თითოეული პარტიის ტესტირება ჩაატაროს. დეფექტის ან მონაცემთა ეროვნულ ბაზასთან შეუთავსებლობის აღმოჩენის შემთხვევაში, მიმწოდებელი ვალდებული იქნება, შესაბამისი პარტია სრულად ჩაანაცვლოს.

შესყიდვის პირობები ითვალისწინებს, რომ გამარჯვებულმა კომპანიამ პროდუქციის მიწოდება ხელშეკრულების გაფორმებიდან არაუგვიანეს 60 კალენდარული დღის ვადაში უნდა განახორციელოს. საქონლის მიწოდება თბილისში, მარშალ გელოვანის გამზირზე მდებარე სურსათის ეროვნული სააგენტოს მისამართზე მოხდება.

კომპანიებს საკუთარი წინადადებების წარდგენა 25 მაისამდე შეეძლებათ.