მთავრობა საქართველოში უცხოელთა რეესტრს შექმნის
საქართველოში უცხოელთა აღრიცხვისა და ქვეყანაში მათი სამართლებრივი მდგომარეობის მონიტორინგის მიზნით, ახალი მონაცემთა ერთიანი ბაზა და უცხოელთა რეესტრი ამოქმედდება.
აღნიშნულს უცხოელთა და მოქალაქეობის არმქონე პირთა სამართლებრივი მდგომარეობის შესახებ კანონში შესული ცვლილებები ითვალისწინებს.
შესაბამისი საკანონმდებლო ცვლილებები ძალაში 2026 წლის 1 სექტემბრიდან შევა.
ახალი რეგულაციით გათვალისწინებულია ორი ძირითადი მიმართულება: უცხოელთა რეესტრის და მონაცემთა ერთიანი ბაზის შექმნა.
"1. უცხოელთა აღრიცხვისა და მათი სამართლებრივი მდგომარეობის შესახებ მონაცემთა ერთიანი ბაზის შექმნის მიზნით, შეიძლება შეიქმნას უცხოელთა რეესტრი, რომლის ადმინისტრირებას განახორციელებს [იუსტიციის სამინისტროს] სახელმწიფო სერვისების განვითარების სააგენტო. უცხოელების შესახებ მონაცემთა ერთიანი ბაზის წარმოების, ამ მონაცემთა ბაზაში არსებული მონაცემების (მათ შორის, ბიომეტრიული მონაცემების) დამუშავებისა და სხვა სახელმწიფო უწყებებისთვის გაზიარების წესები განისაზღვრება საქართველოს მთავრობის დადგენილებით.
2. სახელმწიფო უსაფრთხოების, საზოგადოებრივი უსაფრთხოების ან/და მართლწესრიგის უზრუნველსაყოფად იქმნება იმ უცხოელების შესახებ მონაცემთა ბაზა, რომლებიც საქართველოში კანონიერი საფუძვლის გარეშე იმყოფებიან ან იმყოფებოდნენ. ამ მონაცემთა ბაზის ადმინისტრირებას ახორციელებს საქართველოს შინაგან საქმეთა სამინისტრო", - წერია კანონში.
შსს-ს მონაცემთა ბაზაში არსებული ინფორმაცია და დოკუმენტაცია საჯარო არ იქნება. მონაცემთა ბაზის შექმნისა და წარმოების, აგრეთვე მონაცემების დამუშავებისა და გაცვლის წესებს საქართველოს შინაგან საქმეთა მინისტრი განსაზღვრავს.
უცხოელთა ერთიანი რეესტრის შექმნის შესახებ გასულ თვეში შს მინისტრის მოადგილე ალექსანდრე დარაცხველიძეც საუბრობდა. მინისტრის მოადგილის თქმით, რეესტრი ხელისუფლებას საშუალებას მისცემს, თითოეული უცხოელის ქვეყანაში შემოსვლა, მათი მხრიდან სერვისებით სარგებლობა, არალეგალური მიგრაციის წინააღმდეგ ბრძოლა ეფექტიანი გახდეს.