მთავრობამ საგარეჯო-ბადიაურის მონაკვეთის მშენებელს 2 მიწის ნაკვეთი 4-თვიანი იჯარით გადასცა - განკარგულება

მთავრობამ საგარეჯო-ბადიაურის მონაკვეთის მშენებელს 2 მიწის ნაკვეთი 4-თვიანი იჯარით გადასცა.

კერძოდ, მშენებელ კომპანია Gocay Insaat Taahhut ve Ticaret-ს მთავრობამ კახეთის მაგისტრალის საგარეჯო-ბადიაურის 17-კილომეტრიანი მონაკვეთი, სოფლებში - თოხლიაურსა და შიბლიანში 182 883 კვ.მ.-ის მიწა, 4 თვით იჯარით გადასცა. ამას ითვალისწინებს 1046-ე განკარგულება, რომელსაც ხელს ირაკლი კობახიძე აწერს.

„გოჩაი ინშაათ თააჰჰუთ ვე თიჯარეთ ანონიმ შირქეთის საქართველოს ფილიალმა“ აღნიშნული არასასოფლო-სამეურნეო მიწის ნაკვეთები ფუჭი ქანების სანაყაროს მოწყობისთვის უნდა გამოიყენოს და 2026 წლის 30 სექტემბრის ჩათვლით ყოველთვიურად იჯარით სარგებლობლობაში გადაცემისთვის 4 717 ლარი უნდა გადაიხადოს.

კომპანიამ ფუჭი ქანების სანაყაროს მოწყობამდე, ნიადაგის ნაყოფიერი ფენა უნდა მოხსნას და შეინახოს და იჯარის ვადის ამოწურვამდე 2 თვით ადრე ეს მიწის ნაკვეთი პირვამდელ ან მიახლოებულ პირვანდელ მგომარეობამდე უნდა აღადგინოს.

ცნობისთვის, კახეთის ავტომაგისტრალის 17-კილომეტრიანი საგარეჯო-ბადიაურის მონაკვეთის მშენებლობის ხელშეკრულება 2023 წლის თებერვალში თურქულ საინჟინრო კომპანია Gocay Insaat Taahhut ve Ticaret-ი გაფორმდა და ის მსოფლიო ბანკის მიერ 276.8 მილიონი ლარით ფინანსდება. ეს მონაკვეთი თავდაპირველი ინფორმაციით, წელს უნდა გაიხსნას.

თუმცა აღსანიშნია, რომ ინფრასტრუქტურის სამინისტროს ამ მონაკვეთის მშენებელთან გარკვეული შენიშვნები აქვს, რაც უმოკლეს ვადაში უნდა გამოსწორდეს. ინფრასტრუქტურის სამინისტროს ცნობით, პროექტის ფარგლებში შენდება 4-ზოლიანი ჩქაროსნული გზა, რომელიც მოიცავს ბადიაურთან ახალ სატრანსპორტო კვანძს, 4 ხიდს, 8 გზაგამტარსა და 86 წყალგამტარ მილს. პარალელურად, მოწესრიგდება ადგილობრივი საგზაო ქსელი, რათა ახალი მაგისტრალი მაქსიმალურად ეფექტურად დაუკავშირდეს მიმდებარე გზებს.