მთავრობას საწვავის შეძენა გაუძვირდა

სახელმწიფო შესყიდვების სააგენტოს ვებგვერდზე გამოქვეყნდა 2026 წლის აგვისტოში მთავრობისთვის მისაწოდებელი საწვავის განახლებული ფასები, რომლის მიხედვითაც წინა თვესთან შედარებით ფასები საშუალოდ 5-15%-ით არის გაზრდილი.

კონსოლიდირებული ტენდერის ფარგლებში, მთავრობა რეგულარის მარკის საწვავს "სოკარისგან" ყიდულობს, პრემიუმს "რომპეტროლისგან", სუპერს და დიზელს "ვისოლისგან", ევროდიზელს კი "გალფისგან".

• ევრორეგულარი: ახალი ფასი – 3.02 ლარი (ფასი ივლისში – 2.85 ლარი); მატება – 0.17 ლარი; მატება პროცენტულად – 6.0%; • პრემიუმი: ახალი ფასი – 3.04 ლარი (ფასი ივლისში – 2.87 ლარი); მატება – 0.17 ლარი; მატება პროცენტულად – 5.9%; • სუპერი: ახალი ფასი – 3.34 ლარი (ფასი ივლისში – 3.17 ლარი); მატება – 0.17 ლარი; მატება პროცენტულად – 5.4%; • ევროდიზელი: ახალი ფასი – 3.37 ლარი (ფასი ივლისში – 3.20 ლარი); მატება – 0.17 ლარი; მატება პროცენტულად – 5.6%.

საქართველოს მთავრობა - სამინისტროები და საჯარო უწყებები საწვავს კონსოლიდირებული ტენდერის საფუძველზე ქვეყანაში მოქმედი ძირითადი ნავთობ კომპანიებისგან ყიდულობენ. მხარეებს შორის არსებული ხელშეკრულებიდან გამომდინარე, შესასყიდი ფასი, ყოველთვიურად, სპეციალური ფორმულის საფუძველზე ახლდება.კონტრაქტის მიხედვით, ფასი განისაზღვრება თვის დასაწყისში, წინა თვეში არსებული საშუალო ფასებიდან გამომდინარე. კერძოდ, ხელშეკრულება ეფუძნება თვის განმავლობაში PLATTS EUROPEAN MARKET-ზე დაფიქსირებულ ტონა ბენზინის საშუალო ფასს, ასევე ლარის გაცვლით კურსს, აქციზის და დღგ-ს გადასახადებს. ამ მდგენელებიდან ყოველთვიურად მხოლოდ ორი იცვლება, ესაა Platts-ის ფასი და ლარის კურსი.

ამასთან, კონტრაქტის თანახმად, ფასის გადაანგარიშება ყოველთვიურად ხდება და თუკი ფასის სხვაობა წინა თვესთან შედარებით 3%-ს გადააჭარბებს ის ახალი ფასით იცვლება, 3%-ზე ნაკლები სხვაობის შემთხვევაში კი ავტომატურად წინა თვის ფასი ნარჩუნდება.

ივლისში Platts-ის ფასი 1032 დოლარამდე გაიზარდა (ივნისის ფასი 948 დოლარი იყო), რამაც კონსოლიდირებული ტენდერის ფარგლებში სახელმწიფოსთვის მისაწოდებელი საწვავის ფასის ზრდა განაპირობა.