მთელი საზოგადოება სულმოუთქმელად ველით როდის დატოვებს ის საქართველოს - შალვა პაპუაშვილი გერმანიის ელჩზე

შალვა პაპუაშვილის თქმით, გერმანიის ელჩს პრობლემები აქვს როგორც ვენის კონვენციასთან, ისე ზრდილობასთან.

პარლამენტის სპიკერმა აღნიშნული განცხადება მას შემდეგ გააკეთა, რაც პეტერ ფიშერმა აღნიშნა, რომ შეწუხებულია პაპუაშვილის გამო, რადგან მას „ან ნამდვილად არ ესმის, რას გულისხმობს ევროპა, ან თავს აჩვენებს, რომ არ ესმის“.

შალვა პაპუაშვილის განცხადებით, ელჩის ქმედებებმა ქართულ-გერმანულ ურთიერთობებს ზიანი მიაყენა და ის ფიშერის მიერ ქვეყნის დატოვებას ელოდება.

„მე ვფიქრობდი, ბატონ პეტერს მხოლოდ ვენის კონვენციასთან ჰქონდა პრობლემა და როგორც ჩანს, მას ზრდილობასთანაც პრობლემა აქვს. ძალიან სამწუხაროა, რასაც ვაკვირდებით ჩვენ, რაც ამ ერთმა ადამიანმა გაუკეთა ქართულ-გერმანულ ურთიერთობას. მთელი საზოგადოება სულმოუთქმელად ველით როდის დატოვებს ის საქართველოს, რამდენიმე კვირა დარჩა მის საქართველოში ყოფნას. ველით, რომ საქართველოს დატოვებს და ეს მომენტი დაგვავიწყდება“, - განაცხადა პაპუაშვილმა.

9 მაისს გერმანიის ელჩმა პეტერ ფიშერმა უპასუხა მმართველი გუნდის ბრალდებებს, თითქოს ევროკავშირი საქართველოსთან ურთიერთობებს აზიანებს. ელჩმა ამ ბრალდებებს მცდარი უწოდა:

„შეწუხებული ვარ ბატონი პაპუაშვილის გამო, ვინაიდან მას ან ნამდვილად არ ესმის, რას გულისხმობს ევროპა ან თავს აჩვენებს, რომ არ ესმის და არც ერთი მათგანი არის კარგი. ჩვენ არ ვიღებთ ამ კრიტიკას, უარვყოფთ ამ კრიტიკას და არ ვფიქრობ, რომ ევროკავშირს ან რომელიმე წევრ ქვეყანას ლექციის წაკითხვა სჭირდებოდეს იმასთან დაკავშირებით, თუ რა არის ევროპა. მე ყოველთვის ვუწევ რეკომენდაციას ქართველ ხალხს, რომ წაიკითხონ ევროკავშირის შეთანხმებები, ყველაფერი წერია იქ, თუ რა არის ჩვენი ღირებულებები, რა არის ჩვენი კონსტიტუცია. ჩვენ ვემყარებით ერთიანობას და მრავალფეროვნებას, ვართ მშვიდობიანი, თავისუფალი და კეთილდღეობის მქონე ადგილი და ქართველები ძალიან სასურველები არიან, რომ იყვნენ ჩვენთან, ჩვენი მეგობრები და პარტნიორები“, - აღნიშნა ელჩმა.

ეს პირველი შემთხვევა არ არის, როდესაც „ქართული ოცნების“ ლიდერები გერმანიის ელჩს აკრიტიკებენ. მანამდე მმართველი გუნდის წარმომადგენლებმა პეტერ ფიშერი წინასაარჩევნო პროცესებში ჩარევასა და დიპლომატიური ეთიკის დარღვევაში არაერთხელ დაადანაშაულეს. მას ირაკლი კობახიძემ არაერთხელ უწოდა ტრაგიკული პიროვნება.