მზად ვართ ნაურუსთან დიპლომატიური ურთიერთობების დამყარებისთვის - ირაკლი კობახიძე

ნაურუს რესპუბლიკის მხრიდან ე.წ. აფხაზეთის რესპუბლიკასთან და ე.წ. სამხრეთ ოსეთის რესპუბლიკასთან დიპლომატიური ურთიერთობების გაუქმების გადაწყვეტილებით კიდევ ერთხელ დასტურდება, რომ საერთაშორისო სამართლის ნორმების პატივისცემა და დაცვა არის ჯანსაღი საერთაშორისო ურთიერთობების საფუძველი. ამის შესახებ ირაკლი კობახიძემ მთავრობის სხდომაზე განაცხადა.

პრემიერ-მინისტრმა საგარეო საქმეთა მინისტრს, მაკა ბოჭორიშვილს და ქართველ დიპლომატებს გაწეული სამუშაოსთვის მადლობა გადაუხადა.

„21 ივლისს ნაურუს რესპუბლიკის მთავრობამ მიიღო გადაწყვეტილება ე.წ. აფხაზეთის რესპუბლიკის და ე.წ. სამხრეთ ოსეთის რესპუბლიკის დიპლომატიური ურთიერთობების გაუქმების შესახებ. ამ გადაწყვეტილებით კიდევ ერთხელ დასტურდება, რომ საერთაშორისო სამართლის ნორმების პატივისცემა და დაცვა არის ჯანსაღი საერთაშორისო ურთიერთობების საფუძველი. საქართველო მზადაა, ნაურუს რესპუბლიკასთან დაამყაროს დიპლომატიური ურთიერთობები და ხელი შეუწყოს თანამშრომლობის გაღრმავებას.

მინდა მადლობა გადავუხადო საგარეო საქმეთა მინისტრს, ქალბატონ მაკა ბოჭორიშვილს და თითოეულ დიპლომატს, რომელიც მუშაობს წარმატებული არაღიარების პოლიტიკის განხორციელებისათვის“, - განაცხადა კობახიძემ.

აღსანიშნავია, რომ ნაურუს მიერ აღიარების გაუქმების შემდეგ, მსოფლიოში რჩება მხოლოდ 4 სახელმწიფო, რომელიც აფხაზეთსა და სამხრეთ ოსეთს „დამოუკიდებლად“ აღიარებს: რუსეთი, ნიკარაგუა, ვენესუელა და სირია.

ნაურუ, რომლის მოსახლეობაც დაახლოებით 10 ათას ადამიანს შეადგენს, აფხაზეთისა და სამხრეთ ოსეთის დამოუკიდებლობას 2008 წლის აგვისტოს ომის შემდეგ აღიარებდა.

2017 წელს აშშ-ის მაშინდელი პრეზიდენტის, დონალდ ტრამპის მიერ ხელმოწერილი აქტით, შეწყდა ფინანსური დახმარება იმ ქვეყნებისთვის, რომლებიც საქართველოს ოკუპირებული ტერიტორიების დამოუკიდებლობას ცნობდნენ. ამის გამო ნაურუმ აშშ-ის მიერ დაფინანსებული საერთაშორისო ორგანიზაციების დახმარება დაკარგა.