“მზად ვართ თხევადი გაზის მიწისქვეშა რეზერვუარები მოვაწყოთ, მაგრამ ამას დრო სჭირდება”- ბიზნესი მერიასთან შეხვერას ითხოვს
თხევადი გაზის სექტორი ბიზნესი თბილისის მერიასთან კომუნიკაციას და გარდამავალი პერიოდის დაწესებას ითხოვს.
„თხევადი გაზის ასოციაციის“ ხელმძღვანელის, ნიკა ხოფერიას განცხადებით, ბიზნესი მზად არის დააკმაყოფილოს უსაფრთხოების ახალი სტანდარტები და მოაწყოს მიწისქვეშა რეზერვუარები, თუმცა ამ პროცესს გარკვეული დრო და მუნიციპალიტეტთან კოორდინაცია სჭირდება.
ნიკა ხოფერიას თქმით, მიუხედავად იმისა, რომ შესაბამისი რეგულაცია 2020 წლიდან ანონსდება, ბიზნესსუბიექტებს არ ჰქონიათ მერიასთან კომუნიკაცია იმის თაობაზე, რომ ეს რეგულაციები კონკრეტულად თხევადი გაზის სადგურებსაც შეეხებოდა. მისივე განმარტებით, სექტორისთვის მოულოდნელი აღმოჩნდა მუნიციპალური ინსპექციის მიერ დაწყებული დაჯარიმებების პროცესი.
“ვითხოვთ, რომ მუნიციპალიტეტთან დავიწყოთ მოლაპარაკება. ამდენი ხანია მაგას ვსაუბრობ, რომ კომუნიკაცია ჩვენს შორის შედგეს. ჩვენ ვართ ბიზნესი და მომხმარებლის საუკეთესო ინტერესზე ვართ ორიენტირებულები, ჩვეულებრივი ამბავია, იმავენაირად არის მუნიციპალიტეტიც. ამ ორმა მხარემ, რომლებიც ვსხედვართ ერთ ნავში, უნდა მოვილაპარაკოთ, რა და როგორ უნდა გაკეთდეს, რა ნორმებით უნდა დავიცვათ.
რა დრო დასჭირდება ამ ნორმების დაცვას, ეს დრო ალბათ იქნება დაახლოებით, 12-დან 18 თვემდე, იმიტომ რომ რა დროში მოხდება სანებართვო პირობების გაცემა და დაკმაყოფილება ჯერ არ ვიცით. იმისთვის, რომ ამოთხარო ორმო, ამაზე გჭირდება ნებართვა, უნდა მისწერო მუნიციპალიტეტს, რომ ეს ზონა აკმაყოფილებს თხევადი გაზის სადგურის მოსაწყობად და მოაწყო მიწისქვეშა განთავსების თხევადი გაზის რეზერვუარი. ეს საქართველოში ჯერ არ არის.
თანხმობის მიღების შემდეგ უნდა შეუკვეთო რეზერვუარი ქარხანას, რომლის ჩამოტანასაც 3-4 თვე სჭირდება მინიმუმ. ეს ყველაფერი ჯადოსნური ჯოხით არ კეთდება, არ ხდება.
ფინანსურადაც მზად ვართ, რა საკვირველია ამას სჭირდება ინვესტირება, რისი მზაობაც გვაქვს,”-ამბობს „თხევადი გაზის ასოციაციის“ ხელმძღვანელი ნიკა ხოფერია.