NAEC-მა ე.წ. მეორადი ჩარიცხვის შედეგები გამოაქვეყნა - სტუდენტი კიდევ 1 242 აბიტურიენტი გახდა

შეფასებისა და გამოცდების ეროვნულმა ცენტრმა უმაღლეს და პროფესიულ საგანმანათლებლო დაწესებულებებში ე.წ. მეორადი ჩარიცხვის შედეგები გამოაქვეყნა. აბიტურიენტებს საკუთარი შედეგის გაცნობა ცენტრის ოფიციალურ ვებგვერდზე გამოქვეყნებულ ცხრილში, საგამოცდო ბარათზე მითითებული ცხრანიშნა საიდენტიფიკაციო კოდის მიხედვით შეუძლიათ.

გამოქვეყნებული სტატისტიკის თანახმად, მეორადი ჩარიცხვის პროცესში მონაწილეობის უფლება სულ 4 010 აბიტურიენტს ჰქონდა, თუმცა შესაძლებლობით 1 715-მა ისარგებლა და დარეგისტრირდა. საბოლოოდ, უმაღლეს და პროფესიულ საგანმანათლებლო დაწესებულებებში სწავლის გაგრძელების უფლება 1 242-მა აბიტურიენტმა მოიპოვა, რაც დარეგისტრირებულ მონაწილეთა საერთო რაოდენობის 73%-ს შეადგენს.

NAEC-ის მონაცემებით, შედეგები საგანმანათლებლო საფეხურების მიხედვით ასე გადანაწილდა:

• საბაკალავრო საფეხური: სწავლას 818 აბიტურიენტი გააგრძელებს. მათგან 312 სახელმწიფო უმაღლეს სასწავლებლებში ჩაირიცხა, ხოლო 506 - კერძო უნივერსიტეტებში. • პროფესიული პროგრამები: სწავლის უფლება 408-მა აბიტურიენტმა მოიპოვა (244 - სახელმწიფო, ხოლო 164 - კერძო პროფესიულ სასწავლებელში). • ქართულ ენაში მომზადების პროგრამა: სწავლის უფლება 16-მა გამოსაცდელმა მოიპოვა და ყველა მათგანი სახელმწიფოს მიერ დაფუძნებულ უმაღლეს საგანმანათლებლო დაწესებულებაში ჩაირიცხა.

შეფასებისა და გამოცდების ეროვნულ ცენტრში განმარტავენ, რომ ე.წ. მეორად ჩარიცხვაში მონაწილეობის უფლება ჰქონდათ იმ აბიტურიენტებს, რომლებმაც 2026 წლის ერთიან ეროვნულ გამოცდებზე თითოეული საგნისთვის განსაზღვრული მინიმალური კომპეტენციის ზღვარი გადალახეს, თუმცა ძირითად ეტაპზე ჩარიცხვის უფლება ვერ მოიპოვეს; ასევე მათ, ვინც ვერ გადალახა ეროვნული გამოცდების ზღვარი, თუმცა დაძლია პროფესიული საგანმანათლებლო პროგრამებისათვის დადგენილი მინიმალური ბარიერი.