ნავთობის ფასი მკვეთრად ეცემა – ირანმა სამშვიდობო შეთანხმება გაასაჯაროვა

ირანის სახელმწიფო მედიამ აშშ-სა და ირანს შორის სამშვიდობო შეთანხმების მიზნით მომზადებული ურთიერთგაგების მემორანდუმის პირველადი დეტალები გაავრცელა. ირანულ მედიაში წარმოდგენილი დოკუმენტის თანახმად, ამერიკული სამხედრო ძალები ირანის მიმდებარე ტერიტორიას სრულად დატოვებენ, აშშ-ის სამხედრო-საზღვაო ფლოტი კი ჰორმუზის სრუტის ბლოკადას გააუქმებს.

როგორც ირკვევა, ირანის მხარემ აიღო ვალდებულება, რომ ერთი თვის ვადაში ჰორმუზის სრუტეში კომერციული სატრანზიტო გემების რაოდენობა ომამდელ ნიშნულამდე აღადგინოს. ამასთან, შეთანხმების პროექტით, სრუტეში გემების მიმოსვლის მართვასა და მარშრუტიზაციას ირანი ომანთან მჭიდრო თანამშრომლობით უზრუნველყოფს.

საყურადღებოა, რომ ირანული სახელმწიფო მედიის განმარტებით, დასახელებული დოკუმენტის სამუშაო ვერსიაში სამხედრო ხომალდების საკითხი გათვალისწინებული არ არის.

მნიშვნელოვანია ითქვას, რომ თუ მხარეები საბოლოო შეთანხმებას მომდევნო 60 დღის ვადაში მიაღწევენ, აღნიშნული დოკუმენტი გაეროს უშიშროების საბჭოს სავალდებულო რეზოლუციის სახით დამტკიცდება და კონფლიქტი ოფიციალურად დასრულებული იქნება.

რაც შეეხება რეაქციას ენერგეტიკულ ბირჟაზე, ამბის გავრცელების ფონზე, ნავთობის ფასი საშუალოდ 4.5%-ით დაეცა და ბარელი Brent-ის ღირებულებამ 95 დოლარი შეადგინა, ხოლო WTI-ის ფასი 89 დოლარამდე შემცირდა.