ნეპალში სტიქიის შედეგად დაღუპულთა რიცხვი 939-მდე გაიზარდა

ნეპალში წყალდიდობის შედეგად დაღუპულთა რაოდენობამ 939-ს მიაღწია. ამის შესახებ ინფორმაცია ქვეყნის კატასტროფების მართვის სააგენტომ გაავრცელა.

უწყება ამჟამად 3,925 ადამიანს ეძებს, რომელთა შორის 592 უცხო ქვეყნის მოქალაქეა. ცნობისთვის, მანამდე ოფიციალური სტრუქტურები დაკარგულად 4,247 პირს ასახელებდნენ. სამაშველო ოპერაციების შედეგად სპეციალისტებმა უსაფრთხო ადგილზე უკვე 11 379 ადამიანის გადაყვანა შეძლეს. ყურადღების ეპიცენტრშია ჰიდროელექტროსადგურიც, სადაც კვლავ არის ჩარჩენილი 639 დასაქმებული.

პარალელურად, ცნობილი გახდა, რომ სამძებრო-სამაშველო ოპერაციებში ნეპალის არმიის 8,900 სამხედრო მოსამსახურე ჩაერთო. შეიარაღებული ძალების ქვედანაყოფები რასუვას რეგიონის სოფელ ტიმურედან აღმოსავლეთ ნავალპარასამდე განლაგდნენ.

სამხედროები დაშავებულთა ძებნას, ჩახერგილი გზების გაწმენდასა და მოსახლეობისთვის გადაუდებელი სამედიცინო დახმარების აღმოჩენას კოორდინირებულად ახორციელებენ. ავიაციის გამოყენებით მაშველებმა 109 ადამიანს ევაკუაცია განახორციელეს. მათ შორის ერთი გერმანიის მოქალაქე იყო.

ცნობისთვის, ნეპალში მასშტაბური წყალდიდობა და მეწყრული პროცესები ოთხშაბათს მოსულმა უხვმა ნალექმა და შემდგომ კაშხლის დაზიანებამ გამოიწვია. სტიქიამ ქვეყნის სატრანსპორტო ინფრასტრუქტურასა და ენერგეტიკულ ობიექტებს მნიშვნელოვანი ზიანი მიაყენა.