ნეპალში წყალდიდობის შედეგად მიყენებული ზარალი $2.56 მილიარდად შეფასდა

ნეპალში გასულ კვირას მომხდარი წყალდიდობის შედეგად ქვეყნის უძრავმა ქონებამ, საცხოვრებელმა ფონდმა და ინფრასტრუქტურამ სულ მცირე 387.5 მილიარდი ნეპალური რუპიის ($2.56 მლრდ) ზარალი განიცადა.

ზარალის წინასწარი მონაცემები სტიქიის რისკის შემცირებისა და მართვის ეროვნული სამსახურის ხელმძღვანელმა, დჰარმა რაჯ უპრეტიმ სააგენტო Reuters-ს მიაწოდა. უწყების ხელმძღვანელის განცხადებით, შესაბამისმა სახელმწიფო დეპარტამენტებმა პირველადი შეფასება კოორდინირებულად ჩაატარეს, სრულყოფილ ანგარიშს კი ოფიციალური პირები უახლოეს პერიოდში მოამზადებენ.

აღსანიშნავია, რომ უკვე დაიწყო მუშაობა პირველად აღდგენით სამუშაოებზე, რაც საწყის ოთხ თვეში გზების გაყვანას, დროებითი თავშესაფრების მოწყობას, სასმელი წყლის მიწოდებასა და ელექტროენერგიის ქსელის აღდგენას მოიცავს და რასაც დაახლოებით $52.6 მილიონი დასჭირდება.

უპრეტის განცხადებით, დაზარალებულ რეგიონებში სარეაბილიტაციო სამუშაოები 20,000-მდე საცხოვრებელ სახლს შეეხება. საყურადღებოა, რომ მათ შორის სულ მცირე 7,500 ნაგებობა წყალდიდობამ მთლიანად გაანადგურა.

შეგახსენებთ, სტიქიური უბედურება 26 აგვისტოს მყინვარის ჩამოშლამ გამოიწვია. ჩინეთის საზღვართან მდებარე მდინარე ტრიშულის კალაპოტში ყინულის, ქვებისა და ტალახის მასის ჩამოწოლამ დასახლებული პუნქტები მთლიანად წალეკა. კატასტროფის შედეგად 1,250-ზე მეტი ადამიანი დაიღუპა, 4,200-ზე მეტი პირი კი ამ დრომდე დაკარგულად მიიჩნევა.