ნეთანიაჰუ უმრავლესობის გარეშე რჩება - „ერთიანი სია“ პრეზიდენტს ეიზენკოტის კანდიდატურას წარუდგენს

არაბული პარტიების ალიანსმა „ერთიანმა სიამ“ განაცხადა, რომ გასული კვირის საპარლამენტო არჩევნების შემდეგ, ახალი მთავრობის ფორმირების პროცესში მხარს ოპოზიციის ლიდერს, გადი ეიზენკოტს დაუჭერს.

„ერთიანმა სიამ დღეს, ხუთშაბათს გამოაცხადა, რომ ამ საღამოს სახელმწიფოს პრეზიდენტ იცხაკ ჰერცოგს აცნობებს თავისი გადაწყვეტილების შესახებ გაუწიოს რეკომენდაცია გადი ეიზენკოტს, რათა მას დაევალოს მთავრობის ფორმირება“, - ნათქვამია ალიანსის მიერ გავრცელებულ ოფიციალურ განცხადებაში.

ისრაელის 120-ადგილიან პარლამენტში (ქნესეთი) გასულ არჩევნებზე არაბულმა პარტიებმა რეკორდული 19 მანდატი მოიპოვეს. აღნიშნული შედეგი მათ საშუალებას აძლევს, მომავალი მთავრობის დაკომპლექტების პროცესში მნიშვნელოვანი გავლენა იქონიონ.

უფრო ადრე კიდევ ერთმა მსხვილმა არაბულმა პარტიამ „რაამმაც“ განაცხადა, რომ რეკომენდაციას ეიზენკოტს გაუწევს. ისრაელის საინფორმაციო გამოცემა Ynet-ის ცნობით, ამ გადაწყვეტილების შედეგად ოპოზიციის ლიდერის მოსალოდნელმა მხარდაჭერამ 56 კანონმდებელს მიაღწია.

ამის საპირისპიროდ, ბენიამინ ნეთანიაჰუს 53-მანდატიანმა ბლოკმა შესაძლოა 53 დეპუტატის მხარდაჭერაც კი ვერ უზრუნველყოს.

გამოცემა The Times of Israel-ის ინფორმაციით, ფრაქცია „დეგელ ჰათორამ“, რომელიც „გაერთიანებული თორას იუდაიზმის“ 7 მანდატიდან 4-ს ფლობს, განაცხადა, რომ მხარს არცერთ კანდიდატს არ დაუჭერს. ულტრაორთოდოქსულმა ფრაქციამ ნეთანიაჰუსთან კავშირი მას შემდეგ გაწყვიტა, რაც კოალიციამ ვერ შეძლო კანონის მიღება, რომელიც ხარედი მამაკაცებს სამხედრო სამსახურისგან გაათავისუფლებდა.

ისრაელის პრეზიდენტმა იცხაკ ჰერცოგმა საპარლამენტო არჩევნების ოფიციალურად დადასტურებული შედეგები უკვე მიიღო და პარტიების ლიდერებთან კონსულტაციები დაიწყო.

პრეზიდენტმა სოციალურ ქსელ X-ზე განაცხადა, რომ შეხვდა „რელიგიური სიონიზმის“, „ზეჰუთის“, „შასისა“ და „ისრაელი ჩვენი სახლიას“ წარმომადგენლებს და მათგან მოისმინა რეკომენდაციები იმის შესახებ, თუ ქნესეთის რომელ წევრს უნდა დაეკისროს ახალი მთავრობის ფორმირების პასუხისმგებლობა.