Netflix-ის აქციების ფასი კვარტალური ანგარიშგების გამოქვეყნების შემდეგ 5.55%-ით შემცირდა

სტრიმინგ-პლატფორმების ინდუსტრიის გიგანტმა, Netflix-მა ფისკალური მესამე კვარტალის ფინანსური შედეგები გამოაქვეყნა, რის შემდეგაც კომპანიის აქციების ფასი შემცირდა.

როგორც ირკვევა, კორპორაციის კვარტალურმა შემოსავალმა $12.87 მილიარდი შეადგინა და უოლ-სტრიტის ანალიტიკოსების პროგნოზი ზუსტად გაამართლა. ამასთან, თითო აქციაზე მოგების მაჩვენებელი $0.87-მდე გაიზარდა და ექსპერტების მიერ ნავარაუდევ $0.82-იან ნიშნულს გადააჭარბა.

რაც შეეხება მომხმარებელთა ჩართულობას, უოლ-სტრიტის ყურადღება სწორედ ამ საკითხმა მიიპყრო. კომპანიის ერთ-ერთმა ხელმძღვანელმა, გრეგ პიტერსმა განაცხადა, რომ წლევანდელი ტარიფების ზრდის ფონზე აუდიტორიის აქტივობა ჯანსაღ ნიშნულზე შენარჩუნდა. როგორც ირკვევა, ეს იყო ერთ-ერთი საკითხი, რა მხრივ გაჟღერებული განცხადებაც ინვესტორებს არ მოეწონათ. არსებული ინფორმაციით, ისინი ზრდას მოელოდნენ.

პარალელურად, კორპორაციამ მომდევნო პერიოდის ფინანსური მოლოდინებიც განსაზღვრა, რამაც ინვესტორების დამატებითი იმედგაცრუება გამოიწვია. კერძოდ, Netflix-მა მეოთხე კვარტალის შემოსავლის პროგნოზი $13.44 მილიარდის ფარგლებში დააფიქსირა და ანალიტიკოსების მიერ მოსალოდნელ $13.51 მილიარდს ჩამორჩა. ამას გარდა, სარეკლამო პროდუქტების დაგეგმილზე ნელი დანერგვის გათვალისწინებით, სტრიმინგ-სერვისმა 2026 წლის სარეკლამო შემოსავლის პროგნოზი $3 მილიარდიდან $2.7 მილიარდამდე შეამცირა.

შედეგად, ბირჟის დახურვის შემდეგ გამართულ ვაჭრობაზე Netflix-ის აქციების ფასი 5.55%-ით შემცირდა. ამჟამად ერთი აქცია $64.88-ად იყიდება, კაპიტალიზაცია კი $290.85 მილიარდს შეადგენს.