2025 წელს საფოსტო და საკურიერო კომპანიების შემოსავალმა ₾273.8 მილიონი შეადგინა

საფოსტო და საკურიერო საქმიანობით დაკავებული საწარმოების შემოსავლებმა, სახლში საკვების მიწოდების მომსახურების გარეშე, 2025 წელს 273.8 მილიონ ლარს მიაღწია - ამის შესახებ საქსტატის უახლეს პუბლიკაციაში ვკითხულობთ.

გამოკვლევის შედეგების თანახმად, სექტორის ფინანსური შემოდინებების უდიდესი ნაწილი, 183.45 მლნ ლარი, საერთაშორისო საფოსტო-საკურიერო მომსახურებაზე მოდის, რომელმაც მთლიანი შემოსავლების 67% შეადგინა, ხოლო ადგილობრივი ბაზრის მომსახურებიდან გენერირებულმა წილმა - 90.35 მლნ ლარი, შესაბამისად 33.0%.

ინდუსტრიის შემოსავლების მთავარ მამოძრავებელ ძალას ამანათების სეგმენტი წარმოადგენს - კომპანიების მთლიანი შემოსავლების 76.8% სწორედ ამანათების მიწოდებიდან არის მიღებული.

აღსანიშნავია, რომ უშუალოდ ამანათების მიწოდებიდან მიღებული თანხების სტრუქტურაშიც საერთაშორისო მიმართულება დომინირებს: შემოსავლების 70.3% საერთაშორისო გზავნილებს ეკუთვნის, ხოლო ადგილობრივ გზავნილებზე მხოლოდ 29.7% მოდის.

რაც შეეხება წერილობით კორესპონდენციას, მასზე საწარმოთა საერთო შემოსავლების 17.3% განაწილდა. ამ კატეგორიაშიც უპირატესობა საერთაშორისო ნაკადებს უჭირავს - წერილობითი კორესპონდენციის მიწოდებიდან მიღებული შემოსავლების 57.8% საერთაშორისო გზავნილებზე მოდიოდა, 42.2% კი ადგილობრივ კორესპონდენციას ეკუთვნოდა.

ფინანსურ პარამეტრებთან ერთად, ანგარიში გზავნილების ფიზიკურ მოცულობასაც ასახავს. წლის განმავლობაში კომპანიებმა ჯამში 16.4 მილიონი ამანათი და 7.0 მილიონი წერილობითი კორესპონდენცია გაგზავნეს.

ამასთან, გაზრდილი ოპერაციული მაჩვენებლების ფონზე, 2025 წელს საფოსტო და საკურიერო საქმიანობით დაკავებულ საწარმოებში დასაქმებულთა საშუალო წლიურმა რაოდენობამ 4.6 ათასი ადამიანი შეადგინა, რომელთაგან თითქმის 40%, 1.8 ათასი უშუალოდ კურიერი და ფოსტალიონი იყო.