ნიკა ლომია 10 სტუდენტს დააფინანსებს | ბიზნესმენი კავკასიის უნივერსიტეტის "ცოდნის ელჩების" პროგრამას შეუერთდა
IT კომპანია Spribe-ის თანადამფუძნებელი, ბიზნესმენი ნიკა ლომია კავკასიის უნივერსიტეტის „ცოდნის ელჩების“ პროგრამას შეუერთდა და აფხაზეთში სკოლა დამთავრებულ 10 სტუდენტს დააფინანსებს.
საგანმანათლებლო და კარიერული განვითარების პროგრამა „ცოდნის ელჩების“ მიზანი, აფხაზეთში სკოლა დამთავრებული სტუდენტებისთვის განათლებისა და პროფესიული განვითარების რეალური შესაძლებლობების შექმნაა.
როგორც BMG-ის კავკასიის უნივერსიტეტში განუცხადეს, ნიკა ლომია „ცოდნის ელჩების“ პროგრამის ერთ-ერთი პირველი მხარდამჭერია და მისი ჩართულობა აფხაზეთში სკოლა დამთავრებული ახალგაზრდებისთვის განათლების გზაზე რეალურ შესაძლებლობას ქმნის.
როგორც უნივერსიტეტში განმარტავენ, „პროგრამა „ცოდნის ელჩები“ ეფუძნება პარტნიორობის მოდელს - „ერთი პარტნიორი ერთი სტუდენტი“ და მისი მთავარი იდეაა, ბიზნესის ან ინდივიდუალური მხარდამჭერის ჩართულობით, სტუდენტს მიეცეს არა მხოლოდ სწავლის დაფინანსების, არამედ მენტორობის, კარიერული განვითარების და პროფესიულ გარემოში ინტეგრაციის შესაძლებლობა.
„ნიკა ლომიას მხარდაჭერა აჩვენებს, როგორ შეიძლება ერთმა გადაწყვეტილებამ განათლების გზაზე არა ერთი, არამედ ათი ახალგაზრდა გააძლიეროს. „ცოდნის ელჩები“ ითვალისწინებს სტუდენტებისთვის განათლების დაფინანსებას, პროფესიულ მენტორობას, კარიერულ შეხვედრებსა და სტაჟირების შესაძლებლობებს პარტნიორ კომპანიებში.
პროგრამა ქმნის ხიდს განათლებასა და რეალურ სამუშაო გარემოს შორის ახალგაზრდისთვის, რომელსაც სჭირდება შესაძლებლობა და პარტნიორისთვის, რომელსაც შეუძლია ამ შესაძლებლობის შექმნა“, - აცხადებს კავკასიის უნივერსიტეტის პრეზიდენტი კახა შენგელია.
კავკასიის უნივერსიტეტი გეგმავს პროგრამის განვითარებას და პარტნიორთა წრის გაფართოებას, რათა მომავალში უფრო მეტ სტუდენტს მიეცეს განათლების, მენტორობისა და კარიერული განვითარების შესაძლებლობა.
BM.GE
წყარო: bm.ge