OpenAI-მა და Microsoft-მა შემოსავლების განაწილების ზედა ზღვარი $38 მილიარდით განსაზღვრეს

OpenAI-ი და Microsoft-ი შემოსავლების განაწილების მაქსიმალურ მოცულობაზე შეთანხმდნენ და ის $38 მილიარდით განისაზღვრა. The Information-ის ცნობით, მხარეებს შორის ხელშეკრულების პირობები გასულ თვეში გადაიხედა.

როგორც ირკვევა, აღნიშნული ცვლილება OpenAI-ის საშუალებას მისცემს, პარტნიორული ურთიერთობები ისეთ კომპანიებთანაც დაამყაროს, როგორებიცაა Amazon-ი და Google-ი.

მნიშვნელოვანია ითქვას, რომ დაწესებული ფინანსური ლიმიტი ინვესტორების თვალში კომპანიის მიმზიდველობას ზრდის. არსებული ინფორმაციით, OpenAI-ის ხელმძღვანელობა წლის ბოლოსთვის საფონდო ბირჟაზე გასვლას გეგმავს. გადახდების ზედა ზღვრის არსებობა კომპანიის გრძელვადიანი ფინანსური მდგრადობის გარანტია იქნება. ეს კი ის ფაქტორია, რაც ინვესტორებს საფონდო ბირჟაზე გამოჩენილ ახალ კომპანიაში თანხის დაბანდების სურვილს გაუჩენს.

შეხსენებისთვის, Microsoft-ისა და OpenAI-ს ბიზნეს-პარტნირობა 2019 წლიდან დაიწყო, როცა ტექ-გიგანტმა სტარტაპში $13 მილიარდის ინვესტიცია განახორციელა და წილი მიიღო. თუმცა, დროთა განმავლობაში, სემ ოლტმენის კომპანიას მეტი დამოუკიდებლობის სურვილი და Microsoft-ის პარალელურად სხვა პარტნიორების გაჩენის ინტერესი გაუჩნდა. სწორედ ამ ფაქტს უკავშირდება ორი კომპანიის ამჟამინდელი გადაწყვეტილება.