Oracle-ის კვარტალურმა შემოსავალმა მოლოდინს გადააჭარბა და $19.35 მილიარდი შეადგინა

პროგრამული უზრუნველყოფის მწარმოებელი ამერიკული კორპორაციის, Oracle-ის პირველი ფისკალური კვარტალის შემოსავალმა, უოლ-სტრიტის ანალიტიკოსების მიერ პროგნოზირებულ $19.14 მილიარდს გადააჭარბა და წლიური თითქმის 30%-იანი ზრდის შედეგად, $19.35 მილიარდი შეადგინა.

არსებული ინფორმაციით, თუ გასული წლის ანალოგიურ პერიოდში კომპანიამ $2.93 მილიარდის წმინდა მოგება მიიღო, ამჯერად მაჩვენებელმა $4.68 მილიარდი შეადგინა. ამასთან, ერთ აქციაზე კორექტირებულმა მოგებამ LSEG-ის მიერ ნავარაუდებ $1.74-ს გადააჭარბა და $1.92-ს მიაღწია.

მნიშვნელოვანია ითქვას, რომ ღრუბლოვანი სერვისების შემოსავალი წლიურად 62%-ით გაიზარდა $11.61 მილიარდს გაუტოლდა. ამავე პერიოდში მონაცემთა ცენტრებიდან მიღებული შემოსავალი ორჯერ მეტად გაიზარდა $7.4 მილიარდი შეადგინა.

რაც შეეხება პროგრამული უზრუნველყოფის მიმართულებას, ამ მხრივ შემოსავალი წლიურად 3%-ით შემცირდა და StreetAccount-ის მიერ ნავარაუდები $5.61 მილიარდის ნაცვლად, $5.55 მილიარდს გაუტოლდა.

კომპანიის აღმასრულებელი დირექტორის, კლეი მაგოირკის განცხადებით, კორპორაციამ პირველ კვარტალში, დამატებითი კაპიტალდაბანდების გარეშე, $30 მილიარდზე მეტი ღირებულების ხელოვნური ინტელექტის კონტრაქტები გააფორმა.

როგორც ირკვევა, Oracle-ის სწრაფი ექსპანსია მონაცემთა ცენტრების მასშტაბურ განვითარებასთან არის დაკავშირებული. კომპანიამ პირველ კვარტალში 850 მეგავატის სიმძლავრის მონაცემთა ცენტრები აამოქმედა, ხოლო კაპიტალური ხარჯები გასული წლის $8.50 მილიარდიდან $28.50 მილიარდამდე გაზარდა.

რაც შეეხება სამომავლო პერსპექტივებს, Oracle-მა მეორე ფისკალური კვარტალის შემოსავლების წლიური ზრდა 30%-დან 34%-მდე დიაპაზონში განსაზღვრა. LSEG-ის ანალიტიკოსები აღნიშნულ პერიოდში 32%-იან ზრდასა და $21.20 მილიარდის შემოსავალს პროგნოზირებენ. ამასთან, კომპანიაში მოელიან, რომ ერთ აქციაზე კორექტირებული მოგება $1.85-დან $1.93-მდე იქნება. რაც შეეხება 2027 წელს, ამ პერიოდისთვის კორპორაცია მინიმუმ $90 მილიარდის შემოსავალს მოელის.

აღსანიშნავია, რომ ფინანსური ანგარიშის გამოქვეყნების შემდეგ Oracle-ის აქციების ფასი 4%-ით გაიზარდა. ამჟამად ერთი აქცია $164.20-ად იყიდება, კაპიტალიზაცია კი $448.99 მილიარდს შეადგენს.