Oracle-მა პენტაგონთან $7-მილიარდიანი ხელშეკრულება გააფორმა

ამერიკული ტექნოლოგიური ინდუსტრიის გიგანტმა, Oracle-მა აშშ-ის თავდაცვის სამინისტროსთან 10-წლიანი კონტრაქტი გააფორმა. არსებული ინფორმაციით, შეთანხმების ჯამური ღირებულება $7 მილიარდს აღწევს და ის შეიარაღებული ძალების, სადაზვერვო უწყებებისა და სანაპირო დაცვის მონაცემთა ცენტრების პროგრამული უზრუნველყოფით მომარაგებას ითვალისწინებს.

თავდაცვის სამინისტროს ინფორმაციული ტექნოლოგიების ხელმძღვანელის, კირსტენ დევისის განცხადებით, შესყიდვების პროცესის ოპტიმიზაცია ამერიკელ გადასახადების გადამხდელებს სულ მცირე $441 მილიონს დააზოგინებს.

აღსანიშნავი ფაქტია, რომ ხელშეკრულების გაფორმების ფონზე კომპანიის აქციების ფასი 3%-ით გაიზარდა, ეს კი ტექ-გიგანტისთვის ბოლო პერიოდის ერთ-ერთი საუკეთესო ამბავია, რადგან მიმდინარე წელს Oracle-ის საბაზრო ღირებულება უკვე 38%-ით არის შემცირებული.

კომპანიის წინაშე არსებული გამოწვევების ფონზე სექტორის ექსპერტები განსაკუთრებულ ყურადღებას გარიგების პოლიტიკურ ასპექტზე ამახვილებენ. როგორც ცნობილია, Oracle-ის თანადამფუძნებელი, ლარი ელისონი აშშ-ის პრეზიდენტის, დონალდ ტრამპის აქტიური მხარდამჭერია. მან თეთრ სახლში გამართულ შეხვედრაზე ქვეყანაში Stargate-ის ხელოვნური ინტელექტის მონაცემთა ცენტრების შექმნის გეგმა წარადგინა. პრეზიდენტმა ტრამპმა TikTok-ის ამერიკულ კომპანიაში Oracle-ის წილის შესყიდვასაც დაუჭირა მხარი, ხოლო მაისში, მისი მითითებით, თავდაცვის უწყებამ კომპანიასთან საიდუმლო ქსელებში ახალი ტექნოლოგიების დანერგვის შესახებ შეთანხმებაც გააფორმა.

ცნობისთვის, ეს პირველი შემთხვევა არ არის, როცა აშშ-ის ცენტრალური სადაზვერვო სააგენტო Oracle-თან თანამშრომლობს. ტექ-გიგანტის პირველი კლიენტი სწორედ CIA იყო.