პარიზის სააპელაციო სასამართლომ Airbus-ი და Air France-ი დამნაშავედ ცნო

პარიზის სააპელაციო სასამართლომ 2009 წლის ავიაკატასტროფის საქმეზე კომპანიები Airbus-ი და Air France-ი გაუფრთხილებლობით ადამიანის სიცოცხლის მოსპობაში დამნაშავედ ცნო.

არსებული ინფორმაციით, სასამართლომ ევროპული ავიაგიგანტი და ფრანგული ავიაკომპანია მომხდარზე სრულად და ერთპიროვნულად პასუხისმგებელ მხარეებად გამოაცხადა.

ამასთან, სასამართლომ თითოეულ კომპანიას მაქსიმალური ფინანსური ჯარიმა, €225 000 ($260 971) დააკისრა. მართალია, დასახელებული ფინანსური სანქცია სიმბოლურია, თუმცა, ანალიტიკოსების შეფასებით, ის ორივე კომპანიის რეპუტაციას მნიშვნელოვან ზიანს მიაყენებს.

აღსანიშნი ფაქტია, რომ დასახელებულმა მხარეებმა სასამართლოს განაჩენის უზენაესში გასაჩივრების სურვილი უკვე გამოთქვეს.

რაც შეეხება უშუალოდ ავიაკატასტროფას და მის დეტალებს, 2009 წლის 1 ივნისს Air France-ის რეისის კუთვნილი Airbus 330 ტიპის თვითმფრინავი ატლანტის ოკეანეში ჩავარდა. მომხდარი ტრაგედიის შედეგად ბორტზე მყოფი ყველა, 228 მგზავრი დაიღუპა. გამოძიების დასკვნით, ეკიპაჟმა სიჩქარის საზომი ხელსაწყოების ხარვეზები უყურადღებოდ დატოვა. კერძოდ, როცა ყინულის კრისტალებმა თვითმფრინავის სიჩქარის მიმღები მილები დაახშო, მათ ეს არ გაითვალისწინეს და ფრენა ჩვეულებრივ განაგრძეს. ამ მოვლენამ ავტოპილოტის გამორთვა და ლაინერის კრიტიკული დამუხრუჭება, საბოლოოდ კი უკონტროლო ჩამოვარდნა გამოიწვია.

საბოლოო ანგარიშის მიხედვით, კატასტროფა მცირე მექანიკური ხარვეზების, პილოტების არასათანადო მომზადებისა და მათ შორის კავშირის ნაკლებობის ერთობლიობამ განაპირობა.

ცნობისთვის, საფრანგეთში სასამართლო დავა 2022 წელს დაიწყო.