პარლამენტში ქართული ლუდის ტრადიციების დაცვა-განვითარებისთვის სამუშაო ჯგუფი შეიქმნება
ქართული ლუდის ტრადიციების შემსწავლელი სამუშაო ჯგუფი შეიქმნება, - ამის შესახებ პარლამენტის სოფლის მეურნეობის კომიტეტის თავმჯდომარე გელა სამხარაულმა კომიტეტის სხდომაზე განაცხადა.
მისი ინფორმაციით, რომ პარლამენტის სოფლის მეურნეობის კომიტეტი სპეციალურ სამუშაო ჯგუფს ჩამოაყალიბებს, რომელიც ქართული ლუდის ტრადიციების დაცვისა და განვითარების მიმართულებით იმუშავებს. კომიტეტი, პროცესის ინიციატორი იქნება, ხოლო ჯგუფის მეშვეობით შემდგომში აღმასრულებელი ხელისუფლებისთვის შესაბამისი რეკომენდაციები და მითითებები მომზადდება.
"საქართველო უკვე ფლობს არაერთ საერთაშორისო აღიარებულ არამატერიალურ კულტურულ მემკვიდრეობას. სულ ბოლოს იყო ხორბალთან დაკავშირებული აღიარება. მანამდე ქვევრის ღვინო გვაქვს და კიდევ სხვა ჩვენი საამაყო ღირებულებებია აღიარებული. და ახლა ვმუშაობთ ქართულ ლუდზე, ლუდის ტრადიციებზე, მთის ლუდზე. ბოლო კვლევებმა, როგორც ხორბლის, ისე ქერის მიმართულებით, საკმაოდ შთამბეჭდავი შედეგები აჩვენა. ამასთან, დღემდე შემორჩენილია მთის ლუდის ხარშვის უნიკალური ტრადიციებიც, რომლებიც განსაკუთრებულ ყურადღებას, დაცვასა და განვითარებას საჭიროებს“, - განაცხადა სამხარაულმა.
მისივე ინფორმაციით, საკითხზე მუშაობა უკვე გარკვეული პერიოდია მიმდინარეობს საქართველოს მეცნიერებათა ეროვნული აკადემიასთან თანამშრომლობით. როგორც მან აღნიშნა, სხვადასხვა რეგიონთან დაკავშირებული ინფორმაცია უკვე მოძიებულია და პროცესი აღსრულების ეტაპზე გადადის.
გელა სამხარაულის ინფორმაციით, სამუშაო ჯგუფის შემადგენლობის პირველადი მონახაზი უკვე არსებობს და მასში ის პირები არიან ჩართულნი, რომლებმაც თემაზე კვლევები და შესაბამისი მასალები მოამზადეს. სამუშაო ჯგუფის ოფიციალურად დამტკიცება 29 მაისს დაგეგმილ კომიტეტის სხდომაზე იგეგმება.
BM.GE
წყარო: bm.ge