Petrobras-ის კვარტალური მოგება 7.2%-ით შემცირდა და $6.2 მილიარდი შეადგინა
ბრაზილიის სახელმიწო ენერგეტიკული გიგანტის, Petrobras-ის შემოსავალი 2026 წლის პირველ კვარტალში 11.7%-ით გაიზარდა და $23.5 მილიარდი შეადგინა. არსებული ინფორმაციით, კომპანიის სუფთა მოგება წლიურ ჭრილში 7.2%-ით შემცირდა და $6.2 მილიარდი შეადგინა.
ამასთან, კორექტირებულმა EBITDA-მ $11.3 მილიარდს მიაღწია, რაც გასული წლის ანალოგიურ პერიოდთან შედარებით 8.6%-ით გაზრდილი მაჩვენებელია. თუ გასული წლის პირველ კვარტალში კომპანიამ $21.1 მილიარდის შემოსავალი მიიღო, ამჯერად საოპერაციო მოგებამ $7.3 მილიარდი შეადგინა.
მნიშვნელოვანია ითქვას, რომ შემოსავლების ძირითადი ნაწილი მოპოვებისა და წარმოების სეგმენტზე მოვიდა და $16 მილიარდი შეადგინა. გადასამუშავებელი, ტრანსპორტირებისა და მარკეტინგის მიმართულებით რეალიზაციამ $22.3 მილიარდს მიაღწია. რაც შეეხება გაზისა და დაბალნახშირბადიანი ენერგიის სექტორებს, ამ მხრივ 18.5%-იანი ზრდა დაფიქსირდა და შემოსავლის მაჩვენებელმა $2.2 მილიარდი შეადგინა.
პარალელურად, Petrobras-მა ნავთობისა და გაზის მოპოვება წინა კვარტალთან შედარებით 3.7%-ით გაზარდა. კომპანიის ფინანსური დირექტორის, ფერნანდო მელგარეჟოს განმარტებით, მყარი ფინანსური შედეგები აქტივების ეფექტური მართვიტა და მოპოვების რეკორდული მაჩვენებლებით არის განპირობებული. მისივე თქმით, განხორციელებული ინვესტიციები წარმოების ზრდაზე დადებითად აისახება.
როგორც ირკვევა, საანგარიშო პერიოდში კომპანიამ საერთაშორისო პორტფელიც გააფართოვა და ნამიბიის სანაპიროზე მდებარე 2613-ე ბლოკის 42.5%-იანი წილი შეიძინა. ამასთან, ის სან-ტომე და პრინსიპის ტერიტორიაზე მე-3 ბლოკის ოპერატორი გახდა. პარალელურად, მან ბრაზილიაში "ტარტარუგა ვერდესა" და "ესპადარტეს" საბადოებში წილებიც მოიპოვა.
რაც შეეხება სამომავლო გეგმებს, Petrobras-ი პროგნოზირებს, რომ ნავთობზე ფასების მატება მეორე კვარტალის საექსპორტო მაჩვენებლებზე დადებითად აისახება. ამასთან, კომპანია Búzios 8-ის პროექტის ფარგლებში P-79 ტიპის მცურავ პლატფორმას აამოქმედებს. აღნიშნული ობიექტის სიმძლავრე საწყის ეტაპზე დღეში 180,000 ბარელი იქნება. სრულფასოვნად ამოქმედების შემდეგ კი მას ბრაზილიის ბუნებრივი აირით მომარაგების დღიურად 3 მილიონი კუბური მეტრით გაზრდა შეეძლება.