პირველ კვარტალში შტატგარეშე დასაქმებულებზე მთავრობამ რეკორდული ₾154 მილიონი დახარჯა

ფინანსთა სამინისტრომ გამოაქვეყნა 2026 წლის პირველი კვარტალის ბიუჯეტის შესრულების დეტალური ანგარიში, რომლის მიხედვითაც საანგარიშო პერიოდში საჯარო სექტორში შტატგარეშე სტატუსით დასაქმებულმა პირებმა 154.4 მილიონი ლარის ანაზღაურება აიღეს.

ეს 2025 წლის პირველ კვარტალთან შედარებით შტატგარეშე მოხელეებზე გაწეული ხარჯების 1%-ით, ანუ 1.5 მილიონი ლარით ზრდას ნიშნავს.

რაც შეეხება სახელმწიფო მოხელეებს, რომლებიც შტატით არიან დასაქმებული, 2026 წლის პირველ კვარტალში მათი სახელფასო ფონდი 13%-ით, 775 მილიონ ლარამდე გაიზარდა (მატება +89.5 მლნ ლარი).

ფინანსთა სამინისტრო არ აქვეყნებს ინფორმაციას თუ რამდენი შტატგარეშე მოხელე არის სახელმწიფო უწყებებში დასაქმებული, შესაბამისად უცნობია თუ რამდენმა ადამიანმა აიღო პირველ კვარტალში ჯამურად 154.4 მილიონი ლარი.

რაც შეეხება შტატით დასაქმებულ პირებს, მათი რაოდენობა 117,000-ს შეადგენს, შესაბამისად, ერთი დასაქმებულის მიერ მიღებული ანაზღაურება 2026 წლის პირველ კვარტალში ჯამურად 6625 ლარს შეადგენდა, რაც თვეში 2208 ლარს უდრის, რაც 20%-ის საშემოსავლო გადასახადის გარეშე 1,766 ლარს უდრის.