"პირველადი მონაცემებით, წარმოუდგენლად დიდი მოთხოვნაა სახელმწიფო უნივერსიტეტებზე" - ზვიად გაბისონია

„პირველადი მონაცემებით წარმოუდგენლად დიდი მოთხოვნაა სახელმწიფო უნივერსიტეტების პროგრამებზე“, - ამის შესახებ განათლების მინისტრის მოადგილემ ზვიად გაბისონიამ პარლამენტში განაცხადა.

აღსანიშნავია, რომ 2026-2027 სასწავლო წლისთვის აბიტურიენტების რეგისტრაცია 11 მაისს დასრულდა. ჯერჯერობით დარეგისტრირებული აბიტურიენტების სტატისტიკა ცნობილი არ არის.

"რეგისტრაციების ნაწილზე თქვენ უახლოეს პერიოდში ნახავთ, რომ ჩვენი რეფორმის მთავარი კომპონენტი იქნება ძალიან წარმატებული. პირველადი მონაცემებით წარმოუდგენლად დიდი მოთხოვნაა სახელმწიფო უნივერსიტეტის პროგრამებზე, თუმცა გარკვეული ტიპის კვოტები რჩება კერძო უნივერსიტეტებსაც, რაც ასევე ჩვენთვის ძალიან სასიხარულოა, ვინაიდან ჩვენი ამოცანაა, რომ თანაბრად მოხდეს გადანაწილება.

მთავარი საკითხი, რაც გვაქვს და რასაც პერიოდი სჭირდება, არის ერთი ქალაქი ერთი ფაკულტეტის დეკონცენტრაციის ნაწილი, როცა თანდათან ქუთაისის მიმართულებით გვინდა პროგრამების რაოდენობა გავზარდოთ. მათ შორის ქუთაისის საერთაშორისო უნივერსიტეტში ვმუშაობთ ახალი პროგრამების დამატებაზე. აკაკი წერეთლის სახელობის უნივერსიტეტში ძალიან კარგი პირველადი რეგისტრაციები მიმდინარეობს ამ ნაწილში. ამიტომ ძალიან ოპტიმისტურად ვუყურებთ იმას, რომ პირველივე წელს გვექნება ძალიან წარმატებული შედეგები იმ გათვლებით, რაც მთავრობამ დაგეგმა", - განაცხადა ზვიად გაბისონიამ.

ცნობისთვის, წელს, განათლების რეფორმის ფარგლებში, სწავლა უფასო იქნება სახელმწიფო უნივერსიტეტებში ჩარიცხული ყველა სტუდენტისთვის. კერძო უნივერსიტეტებში კი სახელმწიფო საგრანტო პროგრამა აღარ იმოქმედებს.