პოლონეთი მოითხოვს, მის ტერიტორიაზე აშშ-ის მუდმივი სამხედრო ბაზა განთავსდეს

პოლონეთმა ამერიკის შეერთებულ შტატებს ქვეყნის ტერიტორიაზე მუდმივი სამხედრო ბაზის შექმნასთან დაკავშირებით ოფიციალური თხოვნით მიმართა.

არსებული ინფორმაციით, განცხადება ვარშავამ ოთხშაბათს გაავრცელა და ის პრეზიდენტ დონალდ ტრამპის გადაწყვეტილებას უკავშირდება. გადაწყვეტილებას, რომლის ფარგლებშიც ამერიკის ლიდერმა პოლონეთში დამატებით 5,000 სამხედრო მოსამსახურის გაგზავნის ბრძანება გასცა.

სოციალურ ქსელ X-ში დაწერილ ოფიციალურ მიმართვაში პოლონეთის თავდაცვის მინისტრმა, ვლადისლავ კოსინიაკ-კამიშმა განაცხადა, რომ წინადადება აშშ-ის თავდაცვის მდივან პიტ ჰეგსეტს უკვე გადაეგზავნა. მოგვიანებით, პრესკონფერენციაზე მინისტრმა დააზუსტა, რომ ამჟამად მოთხოვნის დეტალები მეორე მხარესთან ზუსტდება, თუმცა იქვე აღნიშნა, რომ პროცესი სწორი მიმართულებით ვითარდება. მინისტრის თქმით, ვარშავა ამერიკული სამხედრო კონტინგენტის გასაფართოებლად ყველაფერს გააკეთებს.

ცნობისთვის, მუდმივი ბაზის შექმნა პოლონეთის დიდი ხნის მიზანია. ჯერ კიდევ 2018 წელს, ტრამპის პირველი საპრეზიდენტო ვადის დროს, ვარშავამ ეგრედ წოდებული „ფორტ ტრამპის“ დაარსების ინიციატივა წამოაყენა და დასაფინანსებლად $2 მილიარდი გამოყო. მიუხედავად იმისა, რომ ეს მცდელობა წარუმატებელი აღმოჩნდა, ქვეყანაში ამერიკული სამხედროების რაოდენობის მუდმივი ზრდა გაგრძელდა. დღეისათვის პოლონეთში 10,000-მდე ამერიკელი ჯარისკაცი, მუდმივი გარნიზონი და რაკეტსაწინააღმდეგო თავდაცვის ბაზაა განთავსებული.