Porsche შვილობილ კომპანიებს ხურავს და 500 თანამშრომელს ათავისუფლებს

გერმანული პრემიუმ კლასის ავტომწარმოებელი Porsche, ბიზნესის ოპტიმიზაციისა და მოგების ზრდის მიზნით, არაპროფილური აქტივების შემცირების სტრატეგიას აგრძელებს. როგორც ირკვევა, კომპანია სამ შვილობილ საწარმოს ხურავს, რაც დაახლოებით 500 თანამშრომლის დათხოვნას გამოიწვევს.

აღნიშნული გადაწყვეტილება ელემენტების ტექნოლოგიების დეველოპერს, Cellforce Group-ს, ელექტროველოსიპედების ამძრავი სისტემების მწარმოებელ Porsche eBike Performance-სა და მონაცემთა კომუნიკაციის პროგრამულ უზრუნველყოფაზე მომუშავე კომპანია Cetitec-ს ეხება.

მნიშვნელოვანია ითქვას, რომ რეორგანიზაციის ფარგლებში Porsche თავის ძირითად ბიზნესზე ფოკუსირებას გეგმავს, რაც მაღალი კლასის, სპორტული ავტომობილების წარმოებას გულისხმობს.კომპანიის აღმასრულებელი დირექტორის, მაიკლ ლეიტერსის განმარტებით, სტრატეგიული გადაწყობის წარმატებით განსახორციელებლად ამგვარი მიდგომა აუცილებელ საფუძველს წარმოადგენს, ამიტომ რეორგანიზაცია და სამუშაო ადგილების შემცირება კომპანიის განვითარებისთვის აუცილებელია.

ამასთან, ავტომწარმოებელი მეტ ინვესტიციებს შიდა წვის ძრავის მქონე და ჰიბრიდული მოდელების განვითარებაზე მიმართავს, რადგან სრულად ელექტრომობილებზე გადასვლის გეგმამ კრახი განიცადა და კომპანიის მოგება 97%-ით შეამცირა.

რაც შეეხება კომპანიის ბოლოდროინდელ სხვა ნაბიჯებს, Porsche-მ ცოტა ხნის წინ ჰიპერქარების მწარმოებელ Bugatti-სა და ელექტრომობილების მწარმოებელ Rimac Group-ში საკუთარი წილები გაასხვისა, რაც ასევე ხარჯების ოპტიმიზაციასთან იყო დაკავშირებული.