პუტინი ოკუპირებული ცხინვალის „ხელისუფლებასა და ხალხს“ დახმარების გაგრძელებას ჰპირდება

'რუსეთ-ცხინვალის ურთიერთობები წარმატებით ვითარდება კეთილმეზობლობისა და მოკავშირეობის სულისკვეთებით“, - ამის შესახებ აღნიშნულია წერილში, რომლითაც რუსეთის პრეზიდენტი ვლადიმერ პუტინი დროებით ოკუპირებული ცხინვალის ე.წ. „პრეზიდენტს“, მარატ კამბოლოვს ე.წ. „რესპუბლიკის დღეს“ ულოცავს.

ვლადიმერ პუტინის მტკიცებით, მოსკოვი და ცხინვალი „ნაყოფიერად თანამშრომლობენ სხვადასხვა მიმართულებით და ურთიერთობენ რეგიონული უსაფრთხოებისა და სტაბილურობის განმტკიცების ინტერესებიდან გამომდინარე“.

„ჩვენ, უდავოდ, გავაგრძელებთ მჭიდრო ერთობლივ მუშაობას მრავალმხრივი პარტნიორული კავშირების შემდგომი გაღრმავებისა და განვითარების მიზნით“, - აღნიშნულია მისალოც წერილში.

რუსეთის პრეზიდენტის თქმით, კრემლი საოკუპაციო რეჟიმის მხარდაჭერას კვლავ განაგრძობს.

„ასევე მსურს დავადასტურო, რომ რუსეთი გააგრძელებს ყველა შესაძლო დახმარების გაწევას სამხრეთ ოსეთის ხელისუფლებისა და ხალხის მიმართ სახელმწიფოებრიობის მშენებლობისა და სოციალურ-ეკონომიკური განვითარების ამოცანების გადაწყვეტაში“, - წერს პუტინი.

შეგახსენებთ, ოკუპირებულ ცხინვალში ე.წ. „საპრეზიდენტო არჩევნები“ ჩატარდა, რომელშიც, დე ფაქტო ცენტრალური საარჩევნო კომისიის ინფორმაციით, ხმების 84.95%-ით მარატ კამბოლოვმა „გაიმარჯვა“.

საქართველო და საერთაშორისო თანამეგობრობა საოკუპაციო რეჟიმის მიერ ჩატარებულ ე.წ. არჩევნებსა და დღესასწაულებს უკანონოდ მიიჩნევენ და მათ ლეგიტიმურობას არ ცნობენ.