პუტინი ყაზახეთში ჩადის - რას გეგმავს რუსეთის ლიდერი?

რუსეთის პრეზიდენტი ყაზახეთში სახელმწიფო ვიზიტით ჩავა. დაგეგმილი ღონისძიებების წინ, კრემლმა კონკრეტული შეთანხმებების შესახებ პირველადი ინფორმაცია გაასაჯაროვა.

როგორც ირკვევა, ორი ქვეყანა ატომური ელექტროსადგურის მშენებლობის შესახებ ახალ შეთანხმებას გააფორმებს. აღსანიშნია, რომ მოსკოვი პროექტის 85%-ის დაფინანსებას სახელმწიფო საექსპორტო სესხის საშუალებით უზრუნველყოფს.

კრემლის თანაშემწე იური უშაკოვის განცხადებით, ორმხრივ დოკუმენტს ხელი კვირის ბოლოსთვის მოეწერება, ახალი ენერგოობიექტი კი ექსპლუატაციაში 2035-2036 წლებში შევა. აქვე უნდა ითქვას, რომ ატომური სადგურის მშენებლობის პროექტში ჩინეთის ეროვნული ბირთვული კორპორაციაც ჩაერთვება

ცნობისთვის, ყაზახეთს საკუთარი ბირთვული ინფრასტრუქტურა 1999 წლის შემდეგ აღარ ჰქონია. თუმცა ქვეყანამ ახალი სადგურების მშენებლობას მხარი 2024 წლის რეფერენდუმზე დაუჭირა, რის შემდეგაც მოქმედმა ხელისუფლებამ საკითხზე მუშაობა როგორც რუს, ისე ჩინელ პარტნიორებთან ერთად დაიწყო. აღსანიშნავია, რომ 2035 წლისთვის ყაზახეთი 2.4 გიგავატი სიმძლავრის ობიექტების ამუშავებას გეგმავს.

რაც შეეხება, რუსეთის ლიდერის ვიზიტის სხვა დეტალებს, ცნობილია მხოლოდ ის, რომ პუტინი კოლეგასთან ყაზახეთის გავლით ჩინეთში ნავთობის ტრანზიტის გაზრდის საკითხს განიხილავს. როგორც ცნობილია, გასულ წელს მოსკოვი ატასუ-ალაშანკოუს მილსადენით ექსპორტის 12.5 მილიონ ტონამდე გაზრდაზე შეთანხმდა, თუმცა ეს გეგმა ამ დრომდე არ განხორციელებულა.